gham-e-firaq

ubhar rahā hai tasavvur meñ phir vahī manzar

ki ek gosha-e-gulshan meñ tum ko dekhā thā

na jaane kis ke ḳhayāloñ meñ tum thiiñ khoī huī

hasīn kaliyoñ ke dāman meñ tum ko dekhā thā

hai yaad aaj bhī vo shaam vo hasīñ lamha

ki jab ḳhamosh nigāhoñ ne guftugū kī thī

lab-e-hasīñ ke tabassum meñ Duub kar maiñ ne

tumhāre sāmne ḳhud apnī justujū kī thī

tumhārī aañkh meñ ulfat kī raushnī pā kar

mirī nazar ne sitāroñ se dostī kar lī

maiñ tum ko pā ke zamāne ko bhuul baiThā thā

magar tumhīñ ne mohabbat meñ be-ruḳhī kar lī

tumhāre pyaar ke va.adoñ ne saath chhoḌ diyā

ġham-e-firāq meñ ab muskurā nahīñ saktā

tumhārī zulf ke saa.e kā aasrā kho kar

maiñ sāz-e-dil pe koī giit gā nahīñ saktā

mirī vafā mirī vahshat kā hai mujhe ehsās

tum apne dil kī taḌap aazmā nahīñ saktīñ

tumhārā saath kisī aur ko nasīb huā

tum ab nigāh bhī mujh se milā nahīñ saktīñ

ye maanā aks meñ manzar ko Dhaal saktī ho

magar ḳhulūs kī rañgat kahāñ se lāogī

agar ye rañg mile bhī to us se kyā hāsil

tum is meñ soz-e-mohabbat kahāñ se lāogī

tumhāre haath kī tasvīr ḳhūbsūrat hai

ye kuchh bhī ho magar is meñ vo rañg-o-āb kahāñ

bahut hasīn haiñ lekin tumhāre ḳhākoñ meñ

mirī ġhazal mirī nazmoñ kā iztirāb kahāñ

ubhar raha hai tasawwur mein phir wahi manzar

ki ek gosha-e-gulshan mein tum ko dekha tha

na jaane kis ke KHayalon mein tum thin khoi hui

hasin kaliyon ke daman mein tum ko dekha tha

hai yaad aaj bhi wo sham wo hasin lamha

ki jab KHamosh nigahon ne guftugu ki thi

lab-e-hasin ke tabassum mein Dub kar main ne

tumhaare samne KHud apni justuju ki thi

tumhaari aankh mein ulfat ki raushni pa kar

meri nazar ne sitaron se dosti kar li

main tum ko pa ke zamane ko bhul baiTha tha

magar tumhin ne mohabbat mein be-ruKHi kar li

tumhaare pyar ke wadon ne sath chhoD diya

gham-e-firaq mein ab muskura nahin sakta

tumhaari zulf ke sae ka aasra kho kar

main saz-e-dil pe koi git ga nahin sakta

meri wafa meri wahshat ka hai mujhe ehsas

tum apne dil ki taDap aazma nahin saktin

tumhaara sath kisi aur ko nasib hua

tum ab nigah bhi mujh se mila nahin saktin

ye mana aks mein manzar ko Dhaal sakti ho

magar KHulus ki rangat kahan se laogi

agar ye rang mile bhi to us se kya hasil

tum is mein soz-e-mohabbat kahan se laogi

tumhaare hath ki taswir KHubsurat hai

ye kuchh bhi ho magar is mein wo rang-o-ab kahan

bahut hasin hain lekin tumhaare KHakon mein

meri ghazal meri nazmon ka iztirab kahan