ghamon ki aag mein jalna paDega umr bhar hum ko

bahut kuchh soch kar nikle the ghar se ham

ki hijrat kar rahe haiñ ik mohazzab mulk kī jānib

ki shohra hai usī kā saare aalam meñ

ki achchhā hai usī ḳhush-hāl ḳhitta meñ

ziyāda se ziyāda hoñgī apnī ḳhvāhisheñ puurī

hamāre bachche bhī ik achchhe se māhaul meñ rah kar

mohazzab hī baneñge

aur mustaqbil bhī ho jā.egā

un kā har tarah raushan

to phir ā.īna-e-tahzīb meñ

har aks hī uryāñ nazar aaya

aur āñkheñ bhī zamīñ se lag ga.iiñ

aisā huā phir

roz ghar meñ zid se

v c r T v meñ

hamāre bachchoñ ne dekhā

vahī uryāñ tamāsha

kyūñki ḳhabroñ se unheñ koī bhī dilchaspī nahīñ

ab sirf filmeñ dekhnā hī un kī aadat hai

ham un ko man.a karte the magar vo mānte kaise

ki jis māhaul meñ vo rahte haiñ us meñ

aur jo bachche haiñ vo āzād haiñ

māñ-bāp un ko DaañT bhī sakte nahīñ

is mulk kā qānūn us kī pusht par hai

jo baġhāvat par unheñ āmāda kartā hai

lihāzā ham dabāo un pe kaise Daal sakte haiñ

to ham ye sochte haiñ

ab yahāñ rahnā munāsib hī nahīñ hogā

magar bachche kahāñ ye chāhte haiñ

lauT kar jaa.eñ vatan

ya.anī hamārī vāpsī mumkin nahīñ

is fikr meñ ham aur bhī haiñ mubtalā-e-ġham

hamāre ḳhvāb kī duniyā ujaḌ kar rah ga.ī hai

kis ne ye sochā thā

ho jā.egā kyā se kyā

hameñ to ab yahī mahsūs hotā hai

ġhamoñ kī aag meñ jalnā paḌegā

umr bhar ham ko

bahut kuchh soch kar nikle the ghar se hum

ki hijrat kar rahe hain ek mohazzab mulk ki jaanib

ki shohra hai usi ka sare aalam mein

ki achchha hai usi KHush-haal KHitta mein

ziyaada se ziyaada hongi apni KHwahishen puri

hamare bachche bhi ek achchhe se mahaul mein rah kar

mohazzab hi banenge

aur mustaqbil bhi ho jaega

un ka har tarah raushan

to phir aaina-e-tahzib mein

har aks hi uryan nazar aaya

aur aankhen bhi zamin se lag gain

aisa hua phir

roz ghar mein zid se

w c r T w mein

hamare bachchon ne dekha

wahi uryan tamasha

kyunki KHabron se unhen koi bhi dilchaspi nahin

ab sirf filmen dekhna hi un ki aadat hai

hum un ko mana karte the magar wo mante kaise

ki jis mahaul mein wo rahte hain us mein

aur jo bachche hain wo aazad hain

man-bap un ko DanT bhi sakte nahin

is mulk ka qanun us ki pusht par hai

jo baghawat par unhen aamada karta hai

lihaza hum dabao un pe kaise Dal sakte hain

to hum ye sochte hain

ab yahan rahna munasib hi nahin hoga

magar bachche kahan ye chahte hain

lauT kar jaen watan

yani hamari wapsi mumkin nahin

is fikr mein hum aur bhi hain mubtala-e-gham

hamare KHwab ki duniya ujaD kar rah gai hai

kis ne ye socha tha

ho jaega kya se kya

hamein to ab yahi mahsus hota hai

ghamon ki aag mein jalna paDega

umr bhar hum ko