ghaul-e-bayabani

'ajīb raat thī

tamām shahr aañkh muuñd kar paḌā rahā

ye shahr so rahā thā kyoñ

ye ḳhāmushī kī guuñj kyā huī

sukūt kyoñ ye maut kā

vo jāgte raho kī bāzgasht kis nagar ga.ī

sitāra-e-sahar ke saath Dūbne kī aarzū bhī mar ga.ī

musāfirān-e-shab tumhārī aabrū kidhar ga.ī

jo chāñd āsmāñ pe thā to kaise tīrgī tamām shahr meñ utar ga.ī

añdherī shab meñ rāstoñ pe mash'aleñ uThā ke chalne vaale ahl-e-dil kī riit kis ke ghar ga.ī

kise ḳhabar

mujhe kisī se kyā ġharaz

mujhe to bas yahī ḳhabar milī ki raat bhar

mirā 'azīz dost merī jāgtī nazar kā ḳhvāb

merā dil mirā qalam vo mere mez kī kitāb

is sukūt-e-shab meñ mere ham-nashīñ rahe

ai mere shahr raat kaT chukī hai gar

to tere log jaag kyoñ nahīñ rahe

dil-e-figār ko shikast-e-shīsha-e-nigār-e-ḳhvāb kī ḳhabar milī

magar ye kyā ġhazab huā

maiñ aaj ro nahīñ sakā

'ajīb ek raat thī tamām shahr so rahā magar maiñ so nahīñ sakā

'ajib raat thi

tamam shahr aankh mund kar paDa raha

ye shahr so raha tha kyon

ye KHamushi ki gunj kya hui

sukut kyon ye maut ka

wo jagte raho ki bazgasht kis nagar gai

sitara-e-sahar ke sath Dubne ki aarzu bhi mar gai

musafiran-e-shab tumhaari aabru kidhar gai

jo chand aasman pe tha to kaise tirgi tamam shahr mein utar gai

andheri shab mein raston pe mash'alen uTha ke chalne wale ahl-e-dil ki rit kis ke ghar gai

kise KHabar

mujhe kisi se kya gharaz

mujhe to bas yahi KHabar mili ki raat bhar

mera 'aziz dost meri jagti nazar ka KHwab

mera dil mera qalam wo mere mez ki kitab

is sukut-e-shab mein mere ham-nashin rahe

ai mere shahr raat kaT chuki hai gar

to tere log jag kyon nahin rahe

dil-e-figar ko shikast-e-shisha-e-nigar-e-KHwab ki KHabar mili

magar ye kya ghazab hua

main aaj ro nahin saka

'ajib ek raat thi tamam shahr so raha magar main so nahin saka