gawahi de raha hun main

gavāhī de rahā huuñ,

ab se kuchh pahle junūbī shahr ke us paar maiñ dekhā gayā thā

ab jahāñ par ḳhushk peḌoñ ke ghane jañgal haiñ, suune tañg raste

jhāḌiyāñ haiñ

aur lambe zard, jālī-dār pattoñ meñ havā.eñ sarsarātī haiñ

gavāhī de rahā huuñ, ab se kuchh pahle,

jo apne hī lahū meñ Dūbtā dekhā gayā thaa, vo koī mafrūr qaidī thā

jise maiñ jāntā huuñ, ab se kuchh pahle, jo mere zehn ke tapte hue

sahrā meñ bhāgā phir rahā thā

jis kī ḳhvāhish thii:

kahīñ ThanDī ghanerī ghaas par, apnā libās-e-ḳhāk-o-ḳhūñ rakh kar

gul-e-manzar meñ kho jaa.e

gavāhī de rahā huuñ: ab se kuchh pahle,

vo nannhī, shoḳh laḌkī thī

gilahrī sī phudaktī phir rahī thī aam ke sarsabz sāyoñ meñ

use ma.alūm thā shāyad

ki us kī chhātiyoñ meñ maiñ dhaḌaktā huuñ

maiñ dhaḌkan ban gayā thā

us ke siine meñ machaltā thā

vo merā jism thī

shāyad use ma.alūm thaa:

maiñ har gul-e-manzar meñ huuñ aur raat din us kā ta.āqub kar rahā huuñ

ab se kuchh pahle

junūbī shahr ke us paar jo dekhā gayā thā maiñ nahīñ thā

khoj meñ merī vo nannhī shoḳh laḌkī thī

gavāhī de rahā huuñ

ab se kuchh pahle

gawahi de raha hun,

ab se kuchh pahle junubi shahr ke us par main dekha gaya tha

ab jahan par KHushk peDon ke ghane jangal hain, sune tang raste

jhaDiyan hain

aur lambe zard, jali-dar patton mein hawaen sarsaraati hain

gawahi de raha hun, ab se kuchh pahle,

jo apne hi lahu mein Dubta dekha gaya tha, wo koi mafrur qaidi tha

jise main jaanta hun, ab se kuchh pahle, jo mere zehn ke tapte hue

sahra mein bhaga phir raha tha

jis ki KHwahish thi:

kahin ThanDi ghaneri ghas par, apna libas-e-KHak-o-KHun rakh kar

gul-e-manzar mein kho jae

gawahi de raha hun: ab se kuchh pahle,

wo nannhi, shoKH laDki thi

gilahri si phudakti phir rahi thi aam ke sarsabz sayon mein

use malum tha shayad

ki us ki chhatiyon mein main dhaDakta hun

main dhaDkan ban gaya tha

us ke sine mein machalta tha

wo mera jism thi

shayad use malum tha:

main har gul-e-manzar mein hun aur raat din us ka taaqub kar raha hun

ab se kuchh pahle

junubi shahr ke us par jo dekha gaya tha main nahin tha

khoj mein meri wo nannhi shoKH laDki thi

gawahi de raha hun

ab se kuchh pahle