ghungru khol zara

pūran-māshī raat sajī jab

saath zamīñ bhī Dol paḌī

ik mūrat āḳhir bol paḌī

ik baar nahīñ sau baar nahīñ

kyoñ chāhat kā iqrār karūñ

kyoñ raqs ko apne aam karūñ

jis kaam kā hāsil koī na ho

kyoñ aisā koī kaam karūñ

kyoñ aisā koī kaam karūñ

hai koī jo mujh meñ kahtā hai

jo dil meñ hai ab bol zarā

kuchh der ko ghuñgrū khol zarā

ye raqs jo tū kartī hai yahāñ

is raqs meñ tere vahshat hai

jis shaḳhs kī chāhat ulfat hai

vo shaḳhs zamīñ kā baasī hai

vo aam ravayyoñ vaalā hai

vo terī vafā kyā samjhegā

va.adoñ ko nibhānā kyā jaane

vo ishq divāna kyā jaane

vo shaḳhs jo duniyā-dār bhī hai

zardār hai yuuñ nādār bhī hai

āzād bhī hai

ab us kī chāhat chhoḌ ke tū

ḳhalvat meñ ḳhud se bol kabhī

aur ḳhud meñ ḳhud ko ghol kabhī

ye ishq kitābī ishq hai jo

lamhoñ kī lazzat detā hai

phir us kī qīmat letā hai

is ishq-o-mohabbat meñ paḌ kar

tū ḳhud ko yuuñ nāshād na kar

barbād na kar

hai koī jo mujh meñ kahtā hai

aa tujh ko tujh se milvā.ūñ

tū kyā hai tujh ko batlā.ūñ

tū jannat hai tū rahmat hai

tū quvvat hai tū rāhat hai

tū sarvat hai tū barakat hai

aur sab se baḌh kar aurat hai

in lafzoñ ko bhī tol zarā

ḳhalvat meñ ḳhud se bol zarā

kuchh der ko

ghuñgrū khol zarā

puran-mashi raat saji jab

sath zamin bhi Dol paDi

ek murat aaKHir bol paDi

ek bar nahin sau bar nahin

kyon chahat ka iqrar karun

kyon raqs ko apne aam karun

jis kaam ka hasil koi na ho

kyon aisa koi kaam karun

kyon aisa koi kaam karun

hai koi jo mujh mein kahta hai

jo dil mein hai ab bol zara

kuchh der ko ghungru khol zara

ye raqs jo tu karti hai yahan

is raqs mein tere wahshat hai

jis shaKHs ki chahat ulfat hai

wo shaKHs zamin ka basi hai

wo aam rawayyon wala hai

wo teri wafa kya samjhega

wadon ko nibhana kya jaane

wo ishq diwana kya jaane

wo shaKHs jo duniya-dar bhi hai

zardar hai yun nadar bhi hai

aazad bhi hai

ab us ki chahat chhoD ke tu

KHalwat mein KHud se bol kabhi

aur KHud mein KHud ko ghol kabhi

ye ishq kitabi ishq hai jo

lamhon ki lazzat deta hai

phir us ki qimat leta hai

is ishq-o-mohabbat mein paD kar

tu KHud ko yun nashad na kar

barbaad na kar

hai koi jo mujh mein kahta hai

aa tujh ko tujh se milwaun

tu kya hai tujh ko batlaun

tu jannat hai tu rahmat hai

tu quwwat hai tu rahat hai

tu sarwat hai tu barakat hai

aur sab se baDh kar aurat hai

in lafzon ko bhi tol zara

KHalwat mein KHud se bol zara

kuchh der ko

ghungru khol zara