giraft

siyāh raat kā bādal saroñ se chhuTte hī

mire darīche ke nange safed shīshe par

na.e yaqīn ke sūraj ne apnī dastak dī

adhūre ḳhvāb mire TuuT ke bikhar se ga.e

ki jin ke rezoñ ko be-nūr jugnūoñ kī tarah

guzarte lamhoñ paroñ par uḌaa.e phirte haiñ

fazā meñ chāroñ taraf kirchiyāñ sī yādoñ kī

rupahlī dhuup meñ jhalkā rahī haiñ ā.īne

nazar meñ saare manāzir ke ang jhūTe haiñ

mire ḳhayāl kī jaane giraft kis par hai

sitāra-rang haiñ zarrāt chāñd sī hai zamīñ

lahū hai raat kā sūraj ke ābgīne haiñ

ki jis kā ātishī din par chaḌhā huā sā rang

sunahrā jaal hai zartār raushnī kā jaal

azāb-e-jāñ kī tarah ird-gird phailā huā

jise ki rangoñ kī āvāra surma.ī titlī

paroñ meñ shaam ko uljhā ke uḌne vaalī hai

maiñ sochtā huuñ hasīn uñgliyoñ se ḳhvāboñ kī

chamakte jugnū na pakḌūñ nigāh meñ rakh kar

tamām raat fazāoñ meñ us ko uḌne duuñ

siyah raat ka baadal saron se chhuTte hi

mere dariche ke nange safed shishe par

nae yaqin ke suraj ne apni dastak di

adhure KHwab mere TuT ke bikhar se gae

ki jin ke rezon ko be-nur jugnuon ki tarah

guzarte lamhon paron par uDae phirte hain

faza mein chaaron taraf kirchiyan si yaadon ki

rupahli dhup mein jhalka rahi hain aaine

nazar mein sare manazir ke ang jhuTe hain

mere KHayal ki jaane giraft kis par hai

sitara-rang hain zarraat chand si hai zamin

lahu hai raat ka suraj ke aabgine hain

ki jis ka aatishi din par chaDha hua sa rang

sunahra jal hai zartar raushni ka jal

azab-e-jaan ki tarah ird-gird phaila hua

jise ki rangon ki aawara surmai titli

paron mein sham ko uljha ke uDne wali hai

main sochta hun hasin ungliyon se KHwabon ki

chamakte jugnu na pakDun nigah mein rakh kar

tamam raat fazaon mein us ko uDne dun