golkunDa ke sae mein

golkunDā husn-e-tahzīb-o-tamaddun kā dayār

azmat-e-afsāna-e-hastī kī zinda yādgār

sar-bulandī se tirī miltā hai jhuk kar āsmāñ

zarre zarre meñ nazar aatā hai mehr-e-zau-fishāñ

in fazāoñ meñ pahuñch kar aah kho jaatā huuñ maiñ

gum ḳhayāloñ kī hasīn vaadī meñ ho jaatā huuñ maiñ

sāmne rukte haiñ kitne kārvān-e-rang-o-bū

jaise ye ḳhāmoshiyāñ kartī haiñ mujh se guftugū

fikr kī rāhoñ se chhaT jaatā hai sadiyoñ kā ġhubār

saañs letī haiñ bahāreñ jāgte haiñ kohsār

pattharoñ ke dil dhaḌakne kī sadā suntā huuñ maiñ

phuul umīdoñ ke isī gulzār meñ chuntā huuñ maiñ

vaqt ke hāthoñ meñ hai ā.īna-e-shām-o-sahr

jagmagā uTThe haiñ saare aarzū ke bām-o-dar

dekhtā kyā huuñ ki un sañgīñ fasīloñ ke tale

duur tak phaile hue haiñ zindagī ke silsile

nuur ke parcham nazar aate haiñ lahrāte hue

jhuum kar ik dāstān-e-shauq dohrāte hue

āsmāñ se TuuT kar dhartī pe aa jaate haiñ ḳhvāb

kitne hoñToñ kā tabassum kitne chehroñ ke gulāb

dilkashī afkār meñ hai bāñkpan jazbāt meñ

ek nā-mālūm nā-halchal hai mahsūsāt meñ

golkunDa husn-e-tahzib-o-tamaddun ka dayar

azmat-e-afsana-e-hasti ki zinda yaadgar

sar-bulandi se teri milta hai jhuk kar aasman

zarre zarre mein nazar aata hai mehr-e-zau-fishan

in fazaon mein pahunch kar aah kho jata hun main

gum KHayalon ki hasin wadi mein ho jata hun main

samne rukte hain kitne karwan-e-rang-o-bu

jaise ye KHamoshiyan karti hain mujh se guftugu

fikr ki rahon se chhaT jata hai sadiyon ka ghubar

sans leti hain bahaaren jagte hain kohsar

pattharon ke dil dhaDakne ki sada sunta hun main

phul umidon ke isi gulzar mein chunta hun main

waqt ke hathon mein hai aaina-e-sham-o-sahr

jagmaga uTThe hain sare aarzu ke baam-o-dar

dekhta kya hun ki un sangin fasilon ke tale

dur tak phaile hue hain zindagi ke silsile

nur ke parcham nazar aate hain lahraate hue

jhum kar ek dastan-e-shauq dohraate hue

aasman se TuT kar dharti pe aa jate hain KHwab

kitne honTon ka tabassum kitne chehron ke gulab

dilkashi afkar mein hai bankpan jazbaat mein

ek na-malum na-halchal hai mahsusat mein