gomti git ga rahi hai suno

maiñ ki tahzīb kā ik hasīñ baab thī

sāz-e-ulfat ke tāroñ kā mizrāb thī

tīrgī meñ bhī ham-rang-e-mahtāb thī

ārzuoñ kā ik marmarīñ ḳhvāb thī

merā dāman gulāboñ kī mahkār thā

merī āġhosh meñ pyaar hī pyaar thā

muskurātī thiiñ yuuñ dhaan kī bāliyāñ

jaise dehāt kī kam-suḳhan laḌkiyāñ

vo kisānoñ kī ulfat-bharī gāliyāñ

lok gītoñ meñ haiñ jin kī parchhā.iyāñ

jin kī tahzīb merī ravānī meñ hai

jin kī zinda-dilī mere paanī meñ hai

maiñ hamesha sukūñ kī payāmī rahī

mere paanī meñ ik ḳhush-ḳhirāmī rahī

mere naġhmāt kī dhun avāmī rahī

merī qismat meñ lekin ġhulāmī rahī

āḳhirash mujh ko sailāb ne Das liyā

narm bāñhoñ ko tūfān ne kas liyā

merī nāzuk kalā.ī ke kangan luTe

mere dāman ke shādāb gulshan luTe

ya.anī fasloñ ke bharpūr joban luTe

jhoñpaḌe hī nahīñ balki āñgan luTe

maa.eñ bachchoñ se apne judā ho ga.iiñ

bahte paanī meñ kyā jaane kyā ho ga.iiñ

kashtiyoñ kī tarah gaañv bahte rahe

aur qudrat kā har vaar sahte rahe

abr-o-bārāñ ke saa.e meñ rahte rahe

bevafā merī maujoñ ko kahte rahe

khet khaliyān hal jhoñpaḌe chhuT ga.e

aur jiyāle kisānoñ ke dam ghuT ga.e

nā-ḳhudāoñ ko lekin ḳhabar tak na thī

rahnumāoñ ko lekin ḳhabar tak na thī

sūrmāoñ ko lekin ḳhabar tak na thī

kaj-adāoñ ko lekin ḳhabar tak na thī

yak-ba-yak lakhna.ū shahr bahne lagā

goyā paanī meñ kul dahr bahne lagā

ik zarā shāhrāheñ nihāñ ho ga.iiñ

ganj kī raunaqeñ be-nishāñ ho ga.iiñ

muddatoñ ke liye nauha-ḳhvāñ ho ga.iiñ

tab-e-nāzuk pe bār-e-garāñ ho ga.iiñ

shor uTThā ki tahzīb ḳhatre meñ hai

ādamiyyat musībat ke narġhe meñ hai

phir to lākhoñ yahāñ kashtiyāñ aa ga.iiñ

le ke imdād meñ roTiyāñ aa ga.iiñ

fauj vāloñ kī kul bastiyāñ aa ga.iiñ

aur ġharīboñ ne pūchhā kahāñ aa ga.iiñ

gaañv vāloñ kī auqāt hī aur thī

rājdhānī kī kuchh baat hī aur thī

main ki tahzib ka ek hasin bab thi

saz-e-ulfat ke taron ka mizrab thi

tirgi mein bhi ham-rang-e-mahtab thi

aarzuon ka ek marmarin KHwab thi

mera daman gulabon ki mahkar tha

meri aaghosh mein pyar hi pyar tha

muskuraati thin yun dhan ki baaliyan

jaise dehat ki kam-suKHan laDkiyan

wo kisanon ki ulfat-bhari galiyan

lok giton mein hain jin ki parchhaiyan

jin ki tahzib meri rawani mein hai

jin ki zinda-dili mere pani mein hai

main hamesha sukun ki payami rahi

mere pani mein ek KHush-KHirami rahi

mere naghmat ki dhun awami rahi

meri qismat mein lekin ghulami rahi

aaKHirash mujh ko sailab ne Das liya

narm banhon ko tufan ne kas liya

meri nazuk kalai ke kangan luTe

mere daman ke shadab gulshan luTe

yani faslon ke bharpur joban luTe

jhonpaDe hi nahin balki aangan luTe

maen bachchon se apne juda ho gain

bahte pani mein kya jaane kya ho gain

kashtiyon ki tarah ganw bahte rahe

aur qudrat ka har war sahte rahe

abr-o-baran ke sae mein rahte rahe

bewafa meri maujon ko kahte rahe

khet khaliyan hal jhonpaDe chhuT gae

aur jiyale kisanon ke dam ghuT gae

na-KHudaon ko lekin KHabar tak na thi

rahnumaon ko lekin KHabar tak na thi

surmaon ko lekin KHabar tak na thi

kaj-adaon ko lekin KHabar tak na thi

yak-ba-yak lakhnau shahr bahne laga

goya pani mein kul dahr bahne laga

ek zara shahrahen nihan ho gain

ganj ki raunaqen be-nishan ho gain

muddaton ke liye nauha-KHwan ho gain

tab-e-nazuk pe bar-e-garan ho gain

shor uTTha ki tahzib KHatre mein hai

aadamiyyat musibat ke narghe mein hai

phir to lakhon yahan kashtiyan aa gain

le ke imdad mein roTiyan aa gain

fauj walon ki kul bastiyan aa gain

aur gharibon ne puchha kahan aa gain

ganw walon ki auqat hi aur thi

rajdhani ki kuchh baat hi aur thi