ghubar-e-karwan

har-nafas par ham mizāj-e-bāġhbāñ dekhā kiye

yaas kī nazroñ se apnā āshiyāñ dekhā kiye

dekhne vaale bahār-e-gulistāñ dekhā kiye

ham bahāroñ ke pas-e-parda ḳhizāñ dekhā kiye

kar hī kyā sakte the jaur-e-āsmāñ dekhā kiye

TūTtī bijlī ujaḌtā āshiyāñ dekhā kiye

hausla-mandoñ ne pā lī manzil-e-maqsūd bhī

aur ham uḌtā ġhubār-e-kārvāñ dekhā kiye

ham ne dil kī baat kah kar farz puurā kar diyā

ahl-e-fan ahl-e-zabāñ tarz-e-bayāñ dekhā kiye

vaqt kī sāzish hameñ kartī rahī apnā shikār

aur ham hasrat se sū-e-asmāñ dekhā kiye

dil kā samjhānā na thā bas meñ kisī ke ai 'nadīm'

mehrbāñ dekhā kiye nā-mehrbāñ dekhā kiye

intihā ye hai ki ham ne jaan bhī de dī magar

shak kī nazroñ se hamīñ ko bāġhbāñ dekhā kiye

dostoñ ne kar diyā barbād ham ko ai 'razī'

aur ham dil meñ hisāb-e-dostāñ dekhā kiye

har-nafas par hum mizaj-e-baghban dekha kiye

yas ki nazron se apna aashiyan dekha kiye

dekhne wale bahaar-e-gulistan dekha kiye

hum bahaaron ke pas-e-parda KHizan dekha kiye

kar hi kya sakte the jaur-e-asman dekha kiye

TuTti bijli ujaDta aashiyan dekha kiye

hausla-mandon ne pa li manzil-e-maqsud bhi

aur hum uDta ghubar-e-karwan dekha kiye

hum ne dil ki baat kah kar farz pura kar diya

ahl-e-fan ahl-e-zaban tarz-e-bayan dekha kiye

waqt ki sazish hamein karti rahi apna shikar

aur hum hasrat se su-e-asman dekha kiye

dil ka samjhana na tha bas mein kisi ke ai 'nadim'

mehrban dekha kiye na-mehrban dekha kiye

intiha ye hai ki hum ne jaan bhi de di magar

shak ki nazron se hamin ko baghban dekha kiye

doston ne kar diya barbaad hum ko ai 'razi'

aur hum dil mein hisab-e-dostan dekha kiye