guftugu nazm nahin hoti hai

guftugū ke haath nahīñ hote

magar TaToltī rahtī hai dar-o-dīvār

phaaḌ detī hai chhat

shaq kar detī hai sūraj kā siina

uñDel detī hai hiddat-añgez laavā

ḳhākistar ho jaatā hai havā kā jism

guftugū pahlū badaltī hai

aur zamīn āsmān kī jagah le letī hai

raaj hañs dāstānoñ meñ sar chhupā lete haiñ

ūñTniyāñ duudh denā band kar detī haiñ

aur thūthniyāñ āsmān kī taraf uThā.e sahrā ko bad-duā.eñ dene lagtī haiñ

haijānī niiñd palkeñ ukheḌne lagtī hai

aur kachchī nazmeñ sar uThāne lagtī haiñ

guftugū ke paañv nahīñ hote

luḌhaktī phirtī hai

maarī jaatī hai sāñsoñ kī bhagdaḌ meñ

kafnā dī jaatī hai

logoñ ke libās khīñch kar

kāfūr kī tez bū

lipaT jaatī haiñ siine ke pinjar se

aur nazm adhūrī rah jaatī hai

guftugu ke hath nahin hote

magar TaTolti rahti hai dar-o-diwar

phaD deti hai chhat

shaq kar deti hai suraj ka sina

unDel deti hai hiddat-angez lawa

KHakistar ho jata hai hawa ka jism

guftugu pahlu badalti hai

aur zamin aasman ki jagah le leti hai

raj hans dastanon mein sar chhupa lete hain

unTniyan dudh dena band kar deti hain

aur thuthniyan aasman ki taraf uThae sahra ko bad-duaen dene lagti hain

haijaani nind palken ukheDne lagti hai

aur kachchi nazmen sar uThane lagti hain

guftugu ke panw nahin hote

luDhakti phirti hai

mari jati hai sanson ki bhagdaD mein

kafna di jati hai

logon ke libas khinch kar

kafur ki tez bu

lipaT jati hain sine ke pinjar se

aur nazm adhuri rah jati hai