gul-e-be-ghairat

gul khilātī huī barsāt ke mausam kī parī

sub.h kī god meñ lahrātā huā kahlā gaañv

sāmne aañkh ke gaatā huā us meñ tālāb

duur tak bikhrī huī dasht-e-tarab-rez meñ chhāñv

ik ajab shaan se jote hue khetoñ ke qarīb

khil rahe haiñ harī shāḳhoñ pe gul-e-be-ġhairat

kāsnī rang ke ye phuul bhī rakhte haiñ kashish

kis liye tang-nazar karte haiñ in se nafrat

har jagah phuul ye khilte haiñ ajab naaz ke saath

chāhe vo dasht ho yā menD ho yā ho maidāñ

sehn-e-gulshan se nahīñ hai inheñ koī raġhbat

in ko marġhūb hai dar-asl maqām-e-vīrāñ

kyoñ laqab in ko diyā logoñ ne be-ġhairat kā

tang nazroñ ne kiyā asl meñ insāf kā ḳhuuñ

quvvat-e-faislā kā in meñ hai shāyad fuqdān

aql-o-dānish kī jagah in meñ hai maujūd junūñ

dar-haqīqat ye hasīñ gul haiñ bahut dariyā-dil

ġhaur se dekhiye in phūloñ kī fayyāzī ko

har jagah rahte haiñ tayyār ye khilne ke liye

nazar-andāz kiyā logoñ ne is ḳhūbī ko

kyā zarūrat hai ki har phuul khile gulshan meñ

kis liye rang se mahrūm raheñ vīrāne

hai munāsib yahī sahrāoñ meñ bhī phuul khileñ

nazar aane lageñ maidānoñ meñ bhī paimāne

gul khilati hui barsat ke mausam ki pari

subh ki god mein lahraata hua kahla ganw

samne aankh ke gata hua us mein talab

dur tak bikhri hui dasht-e-tarab-rez mein chhanw

ek ajab shan se jote hue kheton ke qarib

khil rahe hain hari shaKHon pe gul-e-be-ghairat

kasni rang ke ye phul bhi rakhte hain kashish

kis liye tang-nazar karte hain in se nafrat

har jagah phul ye khilte hain ajab naz ke sath

chahe wo dasht ho ya meinD ho ya ho maidan

sehn-e-gulshan se nahin hai inhen koi raghbat

in ko marghub hai dar-asl maqam-e-viran

kyon laqab in ko diya logon ne be-ghairat ka

tang nazron ne kiya asl mein insaf ka KHun

quwwat-e-faisla ka in mein hai shayad fuqdan

aql-o-danish ki jagah in mein hai maujud junun

dar-haqiqat ye hasin gul hain bahut dariya-dil

ghaur se dekhiye in phulon ki fayyazi ko

har jagah rahte hain tayyar ye khilne ke liye

nazar-andaz kiya logon ne is KHubi ko

kya zarurat hai ki har phul khile gulshan mein

kis liye rang se mahrum rahen virane

hai munasib yahi sahraon mein bhi phul khilen

nazar aane lagen maidanon mein bhi paimane