gulab aur kapas

khet meñ kaam kartī huī laḌkiyāñ

jeTh kī champa.ī dhuup ne

jin kā sonā badan surma.ī kar diyā

jin ko rātoñ meñ os aur paale kā bistar mile

din ko sūraj saroñ par jale

ye hare lawn meñ

sañg-e-marmar kī benchoñ pe baiThī huī

in hasīñ mūratoñ se kahīñ ḳhūb-sūrat

kahīñ muḳhtalif

jin ke joḌe meñ juuhī kī kaliyāñ sajīñ

jo gulāb aur bele kī ḳhushbū piyeñ

aur rañgoñ kī hiddat se pāgal phireñ

khet meñ dhuup chuntī huī laḌkiyāñ bhī

na.ī umr kī sabz dahlīz par haiñ magar

ā.īna tak nahīñ dekhtīñ

ye gulāb aur daisy kī hiddat se nā-āshnā

ḳhushbūoñ ke javāñ lams se be-ḳhabar

phuul chuntī haiñ lekin pahantī nahīñ

un ke malbūs meñ

tez sarsoñ ke phūloñ kī baas

un kī āñkhoñ meñ raushan kapās

khet mein kaam karti hui laDkiyan

jeTh ki champai dhup ne

jin ka sona badan surmai kar diya

jin ko raaton mein os aur pale ka bistar mile

din ko suraj saron par jale

ye hare lawn mein

sang-e-marmar ki benchon pe baiThi hui

in hasin muraton se kahin KHub-surat

kahin muKHtalif

jin ke joDe mein juhi ki kaliyan sajin

jo gulab aur bele ki KHushbu piyen

aur rangon ki hiddat se pagal phiren

khet mein dhup chunti hui laDkiyan bhi

nai umr ki sabz dahliz par hain magar

aaina tak nahin dekhtin

ye gulab aur daisy ki hiddat se na-ashna

KHushbuon ke jawan lams se be-KHabar

phul chunti hain lekin pahanti nahin

un ke malbus mein

tez sarson ke phulon ki bas

un ki aankhon mein raushan kapas