guman o yaqin

tumheñ gumāñ hai ki zauq-e-yaqīñ hai vaj.h-e-jumūd

asīr-e-qaid-e-tilismāt-e-īn-o-āñ tum ho

maqām-e-sidra-o-tūbā kī kyā ḳhabar tum ko

abhī to chāñd sitāroñ ke darmiyāñ tum ho

ye irtiqā kī tag-o-dau ye jehd-e-fikr-o-amal

gumāñ ke dam se hai in kā vajūd kahte ho

muzāharāt-e-jahāñ par tumheñ yaqīñ kyoñ hai

yaqīñ ko tum to binā-e-jumūd kahte ho

isī yaqīñ pe banāte ho zindagī ke mahal

isī yaqīñ ko samajhte ho zehn kī taqsīr

yahī yaqīñ to hai sūrat-kushā-e-naqsh-e-hayāt

isī yaqīñ se to paanī pe khīñchte ho lakīr

isī yaqīñ se jo ik ḳhatt-e-mustaqīm-e-hayāt

zamīñ pe khīñchnā chāheñ to ham haiñ saudā.ī

tumhīñ batāo ki donoñ meñ kaun afzal hai

hamārā zauq-e-yaqīñ yā tumhārī dānā.ī

tumhein guman hai ki zauq-e-yaqin hai wajh-e-jumud

asir-e-qaid-e-tilismat-e-in-o-an tum ho

maqam-e-sidra-o-tuba ki kya KHabar tum ko

abhi to chand sitaron ke darmiyan tum ho

ye irtiqa ki tag-o-dau ye jehd-e-fikr-o-amal

guman ke dam se hai in ka wajud kahte ho

muzaharaat-e-jahan par tumhein yaqin kyon hai

yaqin ko tum to bina-e-jumud kahte ho

isi yaqin pe banate ho zindagi ke mahal

isi yaqin ko samajhte ho zehn ki taqsir

yahi yaqin to hai surat-kusha-e-naqsh-e-hayat

isi yaqin se to pani pe khinchte ho lakir

isi yaqin se jo ek KHatt-e-mustaqim-e-hayat

zamin pe khinchna chahen to hum hain saudai

tumhin batao ki donon mein kaun afzal hai

hamara zauq-e-yaqin ya tumhaari danai