gurez

maiñ ne jis raah ko muddat se badal Daalā hai

phir se vo raah dikhāne ko chalī aa.ī ho

apne nainoñ se sulagte hue dīpak le kar

pyaar kī jot jagāne ko chalī aa.ī ho

merī ummīd ke TuuTe hue patvāroñ ko

tund hālāt ke tūfān se Takrāne do

ik tahī-dast kī mazlūm tamannāoñ ko

barbariyyat ke har aivān se Takrāne do

ek mehvar hī pe chaltī rahe tā-umr mudām

zindagī itnī mirī jaan subuk-gām nahīñ

apnī majbūr mohabbat kī shikastoñ kī qasam

arsa-e-jehd meñ hastī mirī nākām nahīñ

apnī hassās tabī.at kī qasam hai mujh ko

dil meñ ab pyaar kā pahlā sā vo ehsās nahīñ

in meñ ab ek na.ī aag kī hiddat hai magar

mere anfās meñ ab pahlī sī bū-bās nahīñ

jis kī tanvīr nikhāregī mohabbat kā jamāl

ab mire zehn meñ vo sub.h sī lahrātī hai

raah kī zulmat-e-be-rang ke bā-vasf mujhe

jagmagātī huī qindīl nazar aatī hai

main ne jis rah ko muddat se badal Dala hai

phir se wo rah dikhane ko chali aai ho

apne nainon se sulagte hue dipak le kar

pyar ki jot jagane ko chali aai ho

meri ummid ke TuTe hue patwaron ko

tund haalat ke tufan se Takrane do

ek tahi-dast ki mazlum tamannaon ko

barbariyyat ke har aiwan se Takrane do

ek mehwar hi pe chalti rahe ta-umr mudam

zindagi itni meri jaan subuk-gam nahin

apni majbur mohabbat ki shikaston ki qasam

arsa-e-jehd mein hasti meri nakaam nahin

apni hassas tabiat ki qasam hai mujh ko

dil mein ab pyar ka pahla sa wo ehsas nahin

in mein ab ek nai aag ki hiddat hai magar

mere anfas mein ab pahli si bu-bas nahin

jis ki tanwir nikhaaregi mohabbat ka jamal

ab mere zehn mein wo subh si lahraati hai

rah ki zulmat-e-be-rang ke ba-wasf mujhe

jagmagati hui qindil nazar aati hai