gurudev

ai mire shā.ir-e-qad-āvar-e-shīrīñ-guftār

lab-e-afkār ko baḳhshā hai tabassum tū ne

dil kī ḳhāmosh umangoñ ko zabāñ baḳhshī hai

rūh-e-afsurda ko baḳhshā hai tarannum tū ne

tere siine meñ jo thā sho.ala-e-afkār nihāñ

naḳhl-e-bātil kī har ik shāḳh jalā dī us ne

pūrabī saaz pe jo tū ne tarāna chheḌā

bazm-e-maġhrib meñ bhī ik aag lagā dī us ne

hai ye taslīm gurudev vatan meñ tere

zindagī ḳhāk-basar aaj nazar aatī hai

jis taraf dekhiye hai tīra-dilī kā manzar

raushnī shahr-badar aaj nazar aatī hai

qaul terā ye mujhe yaad hai 'tagore' magar

tīrgī laakh baḌhe us kā hai anjām sahar

ai mere shair-e-qad-awar-e-shirin-guftar

lab-e-afkar ko baKHsha hai tabassum tu ne

dil ki KHamosh umangon ko zaban baKHshi hai

ruh-e-afsurda ko baKHsha hai tarannum tu ne

tere sine mein jo tha shoala-e-afkar nihan

naKHl-e-baatil ki har ek shaKH jala di us ne

purabi saz pe jo tu ne tarana chheDa

bazm-e-maghrib mein bhi ek aag laga di us ne

hai ye taslim gurudew watan mein tere

zindagi KHak-basar aaj nazar aati hai

jis taraf dekhiye hai tira-dili ka manzar

raushni shahr-badar aaj nazar aati hai

qaul tera ye mujhe yaad hai 'tagore' magar

tirgi lakh baDhe us ka hai anjam sahar