ghurur ka anjam

manzūm kahānī

hāmid thā madrase kā ik honhār bachcha

juuyā thā ilm kā vo thā kāmgār bachcha

izzat baḌoñ kī kartā chhoToñ se pyaar kartā

sab ko salām kartā sab se adab se miltā

paikar ḳhulūs kā thā yuuñ bā-tamīz thā vo

apne hoñ yā parā.e sab kā aziiz thā vo

ik roz us ke dil meñ shaitān aa samāyā

phir kyā thā ḳhud-numā.ī ne sar bahut uThāyā

sochā yūñhī nahīñ ye logoñ pe dhaak merī

shāyad yahāñ sabhoñ se ūñchī hai naak merī

sab chāhte haiñ mujh ko maiñ sab kā huuñ dulārā

shāyad nahīñ hai raushan mujh sā kisī kā taara

ye sochte haiñ aisā maġhrūr ho gayā vo

iḳhlās-o-nek-sīrat se duur ho gayā vo

milne lagī sharārat hī meñ use to lazzat

vo māntā burā jab kartā koī nasīhat

tañg aa ke rafta-rafta logoñ ne saath chhoḌā

yāroñ ne muñh ko moḌā apnoñ ne rishta toḌā

auroñ se duur ho kar apne meñ kho gayā vo

bastī meñ madrase meñ tanhā sā ho gayā vo

saath us ke madrase ab sāthī koī na jaatā

ab saath vo kisī ke hargiz na khel paatā

ik roz rāste meñ dekhā na us ne patthar

zaḳhmī huā vo kaafī khaa.ī jo us ne Thokar

ḳhuun itnā bah gayā ki behosh ho gayā vo

aayā jo hosh apnī hālat pe ro paḌā vo

koī na thā vahāñ jo us kī madad ko aatā

lañgḌātā aur rotā us shaam ghar ko pahuñchā

ek hafta ba.ad us kā sālāna imtihāñ thā

lekin ilaaj hī meñ hafta vo saarā guzrā

din imtihāñ ke bārish ne rāste meñ gherā

peḌoñ ke nīche dubkā chhatrī na lā sakā thā

vaise to sāthiyoñ ko us ne bahut pukārā

lekin kisī ko us par mutlaq taras na aayā

al-qissa imtihāñ meñ nākām ho gayā vo

thā nek-nām kal tak badnām ho gayā vo

bachcho faqat kahānī hargiz ise na jaano

ye baat qīmtī hai dil se tum is ko maano

bhūle se bhī na hargiz dil meñ ġhurūr aa.e

kirdār bhī ho aisā sab ko surūr aa.e

kartā hai ḳhaak jism-o-jāñ ko ġhurūr aise

sūkhe hue shajar ko khā jaa.e aag jaise

manzum kahani

hamid tha madrase ka ek honhaar bachcha

juya tha ilm ka wo tha kaamgar bachcha

izzat baDon ki karta chhoTon se pyar karta

sab ko salam karta sab se adab se milta

paikar KHulus ka tha yun ba-tamiz tha wo

apne hon ya parae sab ka aziz tha wo

ek roz us ke dil mein shaitan aa samaya

phir kya tha KHud-numai ne sar bahut uThaya

socha yunhi nahin ye logon pe dhak meri

shayad yahan sabhon se unchi hai nak meri

sab chahte hain mujh ko main sab ka hun dulara

shayad nahin hai raushan mujh sa kisi ka tara

ye sochte hain aisa maghrur ho gaya wo

iKHlas-o-nek-sirat se dur ho gaya wo

milne lagi shararat hi mein use to lazzat

wo manta bura jab karta koi nasihat

tang aa ke rafta-rafta logon ne sath chhoDa

yaron ne munh ko moDa apnon ne rishta toDa

auron se dur ho kar apne mein kho gaya wo

basti mein madrase mein tanha sa ho gaya wo

sath us ke madrase ab sathi koi na jata

ab sath wo kisi ke hargiz na khel pata

ek roz raste mein dekha na us ne patthar

zaKHmi hua wo kafi khai jo us ne Thokar

KHun itna bah gaya ki behosh ho gaya wo

aaya jo hosh apni haalat pe ro paDa wo

koi na tha wahan jo us ki madad ko aata

langData aur rota us sham ghar ko pahuncha

ek hafta baad us ka salana imtihan tha

lekin ilaj hi mein hafta wo sara guzra

din imtihan ke barish ne raste mein ghera

peDon ke niche dubka chhatri na la saka tha

waise to sathiyon ko us ne bahut pukara

lekin kisi ko us par mutlaq taras na aaya

al-qissa imtihan mein nakaam ho gaya wo

tha nek-nam kal tak badnam ho gaya wo

bachcho faqat kahani hargiz ise na jaano

ye baat qimti hai dil se tum is ko mano

bhule se bhi na hargiz dil mein ghurur aae

kirdar bhi ho aisa sab ko surur aae

karta hai KHak jism-o-jaan ko ghurur aise

sukhe hue shajar ko kha jae aag jaise