guzarte lamhon ka matam

sunahre ḳhvāboñ kī vaadī meñ muddatoñ ham ne

ka.ī makān basā.e ka.ī makīñ badle

tamām umr rahā intizār kā aalam

guzarte lamhoñ kā mātam kiyā niDhāl rahe

na dostoñ meñ koī ab na dushmanoñ meñ koī

hamāre maazī kā ham se hisāb le kar jo

hamāre sūd-o-ziyāñ kā lagā ke andāza

hameñ batā.e ki kyā khoyā ham ne kyā paayā

bas ek vaqt kī Thokar ba-shakl-e-shām-o-sahar

hamāre paañv meñ lag lag ke pūchhtī hai roz

kahāñ se aa.e ho kab tak chaloge tum yūñhī

javāb is kā bhī hai us ke paas hī lekin

savāl karne kī aadat sī paḌ ga.ī hai use

sunahre KHwabon ki wadi mein muddaton hum ne

kai makan basae kai makin badle

tamam umr raha intizar ka aalam

guzarte lamhon ka matam kiya niDhaal rahe

na doston mein koi ab na dushmanon mein koi

hamare mazi ka hum se hisab le kar jo

hamare sud-o-ziyan ka laga ke andaza

hamein batae ki kya khoya hum ne kya paya

bas ek waqt ki Thokar ba-shakl-e-sham-o-sahar

hamare panw mein lag lag ke puchhti hai roz

kahan se aae ho kab tak chaloge tum yunhi

jawab is ka bhi hai us ke pas hi lekin

sawal karne ki aadat si paD gai hai use