hashiye par likhi gai nazm

mujhe rangoñ se mohabbat thī

zindagī ke canvas par

maiñ na.e naqsh-o-nigār banānā chāhtā thā

husn kī hashr-sāmāniyāñ painT karne kī ḳhvāhish

mere lahū meñ sarsarātī thī

alhaḌ jismoñ ke zāviye

mere mū-qalam ko apnī jānib khīñchte the

āñkhoñ kī gahrā.iyoñ meñ bahte hue ḳhat

mujhe betāb karte the

mohabbat kī nazmoñ kī taḳhlīq par

mujhe musavvir banāne par tule hue the

hañste hue ruḳhsāroñ meñ bante hue Dimple

magar

maiñ majbūr kar diyā gayā

jalte hue shahr kī tasvīr-kārī par

masḳh-shuda chehroñ kī shanāḳht ke liye

phūloñ aur bachchoñ ke nauhe likhne par

qadīm lafzoñ ko na.ī ma.anaviyyat dene ke liye

mujhe ek zindagī daan karnā paḌī

mujhe rangon se mohabbat thi

zindagi ke canwas par

main nae naqsh-o-nigar banana chahta tha

husn ki hashr-samaniyan painT karne ki KHwahish

mere lahu mein sarsaraati thi

alhaD jismon ke zawiye

mere mu-qalam ko apni jaanib khinchte the

aankhon ki gahraiyon mein bahte hue KHat

mujhe betab karte the

mohabbat ki nazmon ki taKHliq par

mujhe musawwir banane par tule hue the

hanste hue ruKHsaron mein bante hue Dimple

magar

main majbur kar diya gaya

jalte hue shahr ki taswir-kari par

masKH-shuda chehron ki shanaKHt ke liye

phulon aur bachchon ke nauhe likhne par

qadim lafzon ko nai manawiyyat dene ke liye

mujhe ek zindagi dan karna paDi