hairat-KHana-e-imroz

ab koī phuul mire dard ke dariyā meñ nahīñ

ab koī zaḳhm mire zehn ke sahrā meñ nahīñ

na kisī jannat-e-arzī kā havāla mujh se

na jahannam kā dahaktā huā sho.ala koī

mere ehsās ke parde pe ravāñ rahtā hai

maiñ kahāñ huuñ? mujhe ma.alūm nahīñ!!

bolte lafz bhī ḳhāmosh tamannā.ī haiñ

jāgte ḳhvāb kī ta.abīr yahī hai shāyad

merī taqdīr yahī hai shāyad

maiñ jise dekhnā chāhūñ mujhe andhā kah de!

kaun huuñ maiñ mujhe ai dīda-e-bīnā kah de!

zindagī kyuuñ kisī mafhūm se aarī hī rahī

dhuup meñ jism sulagte hī chale jaate haiñ

maut kā ḳhauf simaTtā hai bikhar jaatā hai

fāḳhta jaise kisī peḌ kī shāḳhoñ meñ chhupī baiThī ho

saañs siine meñ kisī tiir kī mānind utar jaatī hai

muñh chhupā.e hue sūraj bhī fanā kī tasvīr

pyaas ban kar kisī dariyā meñ utar jaatā hai

aas ne yaas ke mahtāb se ḳhushbū māñgī

chehra-e-gul pe kisī qatra-e-shabnam kī duā utrī hai

ab koi phul mere dard ke dariya mein nahin

ab koi zaKHm mere zehn ke sahra mein nahin

na kisi jannat-e-arzi ka hawala mujh se

na jahannam ka dahakta hua shoala koi

mere ehsas ke parde pe rawan rahta hai

main kahan hun? mujhe malum nahin!!

bolte lafz bhi KHamosh tamannai hain

jagte KHwab ki tabir yahi hai shayad

meri taqdir yahi hai shayad

main jise dekhna chahun mujhe andha kah de!

kaun hun main mujhe ai dida-e-bina kah de!

zindagi kyun kisi mafhum se aari hi rahi

dhup mein jism sulagte hi chale jate hain

maut ka KHauf simaTta hai bikhar jata hai

faKHta jaise kisi peD ki shaKHon mein chhupi baiThi ho

sans sine mein kisi tir ki manind utar jati hai

munh chhupae hue suraj bhi fana ki taswir

pyas ban kar kisi dariya mein utar jata hai

aas ne yas ke mahtab se KHushbu mangi

chehra-e-gul pe kisi qatra-e-shabnam ki dua utri hai