halki aur bhaari chizen

ek golī

bahut halkī hotī hai

galī ke kone par khaḌe laḌke kī

bandūq se nikalne ke ba.ad

duur faleToñ meñ

khiḌkī se nikle baazū tak pahuñchte vaqt

vo apnā saarā vazn

apnī saarī tāqat kho detī hai

aur baazū meñ surāḳh karne ke ba.ad

aage nahīñ baḌh paatī

vahīñ rah jaatī hai golī ke baazū meñ rah jaane se

aadmī ko bahut taklīf hotī hai

agar is golī ke saath

do tiin goliyāñ aur bhī hotīñ

to shāyad aadmī ko aur ziyāda taklīf ho rahī hotī

vo ye baat nahīñ sochtā

aur karāhne lagtā hai

ziyāda goliyoñ se us kī maut bhī vaaqe ho saktī thī

vo ye baat bhī nahīñ sochtā

aur rone lagtā hai

goliyoñ se bhī kam vazn rakhne vaale aañsū

bistar kī chādar aur paroñ se bhare takiye meñ

jazb ho jaate haiñ

baazū meñ aTkī huī golī ke ḳhayāl se

vo ye bhī nahīñ sochtā

ki agar us ke ba.ad halke aañsū takiye yā chādar par girne ke bajā.e

bhārī bandūq par girte rahte

to ek na ek din

use zañg lag jaatā

yā phir us kī taraf golī bhejne vaale

laḌke kā saḳht dil

us ke aañsū dekh kar

mom ho jaatā

bhārī chīzoñ kī jagah

halkī chīzeñ le letīñ

halkī chīzoñ kī jagah

kuchh aur na aa paatā

ek goli

bahut halki hoti hai

gali ke kone par khaDe laDke ki

banduq se nikalne ke baad

dur faleTon mein

khiDki se nikle bazu tak pahunchte waqt

wo apna sara wazn

apni sari taqat kho deti hai

aur bazu mein suraKH karne ke baad

aage nahin baDh pati

wahin rah jati hai goli ke bazu mein rah jaane se

aadmi ko bahut taklif hoti hai

agar is goli ke sath

do tin goliyan aur bhi hotin

to shayad aadmi ko aur ziyaada taklif ho rahi hoti

wo ye baat nahin sochta

aur karahne lagta hai

ziyaada goliyon se us ki maut bhi waqe ho sakti thi

wo ye baat bhi nahin sochta

aur rone lagta hai

goliyon se bhi kam wazn rakhne wale aansu

bistar ki chadar aur paron se bhare takiye mein

jazb ho jate hain

bazu mein aTki hui goli ke KHayal se

wo ye bhi nahin sochta

ki agar us ke baad halke aansu takiye ya chadar par girne ke bajae

bhaari banduq par girte rahte

to ek na ek din

use zang lag jata

ya phir us ki taraf goli bhejne wale

laDke ka saKHt dil

us ke aansu dekh kar

mom ho jata

bhaari chizon ki jagah

halki chizen le letin

halki chizon ki jagah

kuchh aur na aa pata