hum donon

ham donoñ kā rishta dukh kā rishta thā

ham donoñ ik duuje ke sang ro sakte the

ham donoñ ik duuje ke sang ro.e bhī

phir ham meñ se ek ne hañsnā siikh liyā

ham donoñ kī āñkheñ bojhal āñkheñ thiiñ

ham donoñ ke ḳhvāb baḌe naḳhrīle the

ham donoñ ne raat kī chādar phāḌī thī

phir ham meñ se ek ne sonā siikh liyā

ham donoñ ik bastī ke do bargad the

ham donoñ pe bachche jhūlā karte the

ham donoñ ko maa.eñ kosā kartī thiiñ

phir ham meñ se ek ne chalnā siikh liyā

ham donoñ ik dariyā ke shaidā.ī the

ham donoñ pe aag kī vahshat taarī thī

ab ham donoñ ke marne kī baarī thī

phir ham se ek ne jiinā siikh liyā

hum donon ka rishta dukh ka rishta tha

hum donon ek duje ke sang ro sakte the

hum donon ek duje ke sang roe bhi

phir hum mein se ek ne hansna sikh liya

hum donon ki aankhen bojhal aankhen thin

hum donon ke KHwab baDe naKHrile the

hum donon ne raat ki chadar phaDi thi

phir hum mein se ek ne sona sikh liya

hum donon ek basti ke do bargad the

hum donon pe bachche jhula karte the

hum donon ko maen kosa karti thin

phir hum mein se ek ne chalna sikh liya

hum donon ek dariya ke shaidai the

hum donon pe aag ki wahshat tari thi

ab hum donon ke marne ki bari thi

phir hum se ek ne jina sikh liya