hum ek hain

hai apnā yaqīñ desh ke dīvāne sabhī haiñ

is sham.a-e-ziyā-bār ke parvāne sabhī haiñ

haiñ vaqf yahāñ is kī mohabbat ke liye ham

jaañ de deñge is desh kī azmat ke liye ham

koī bhī hameñ is se judā kar nahīñ saktā

ham se bhī koī is kā gila kar nahīñ saktā

tā-zīst isī ke liye sarshār raheñge

is mai ke hamesha hī talabgār raheñge

izzat ko kabhī is kī girāne nahīñ deñge

dushman ko kabhī aañkh uThāne nahīñ deñge

ulfat hai to āñkhoñ ke guhar ek haiñ apne

do samt sahī dil to magar ek haiñ apne

zinhār na 'shāhid' burā aapas meñ kaheñge

ham ek the ham ek haiñ ham ek raheñge

hai apna yaqin desh ke diwane sabhi hain

is shama-e-ziya-bar ke parwane sabhi hain

hain waqf yahan is ki mohabbat ke liye hum

jaan de denge is desh ki azmat ke liye hum

koi bhi hamein is se juda kar nahin sakta

hum se bhi koi is ka gila kar nahin sakta

ta-zist isi ke liye sarshaar rahenge

is mai ke hamesha hi talabgar rahenge

izzat ko kabhi is ki girane nahin denge

dushman ko kabhi aankh uThane nahin denge

ulfat hai to aankhon ke guhar ek hain apne

do samt sahi dil to magar ek hain apne

zinhaar na 'shahid' bura aapas mein kahenge

hum ek the hum ek hain hum ek rahenge