hum ki insan nahin aankhen hain

kyā faqat dekhte rahne se masā.il kī girah khultī hai

kyā faqat aañkh kī putlī meñ hai mahfūz ḳhudā.ī saarī

ham ki insān nahīñ āñkheñ haiñ

ham ne āñkhoñ ko ḳhudā samjhā ḳhudā.ī jaanā

aa.ina dekhā to in āñkhoñ ne ḳhud ko bhī nahīñ pahchānā

dekhte dekhte pathrā ga.iiñ donoñ āñkheñ

phir bhī chehra na nazar aayā kahīñ

phir bhī dekhe nahīñ dast-o-bāzū

jaan kar ham ne har ik chiiz se inkār kiyā

zaat se

zaat ke gard ḳhudā.ī ke manāzir se

manāzir meñ chhupī sadiyoñ kī mazlūm tamannāoñ se

phoḌ do dekhne vaalī āñkheñ

ham tamāshā.ī nahīñ khel ke kirdār bhī haiñ

apne kirdār ke zindāñ meñ giraftār bhī haiñ

ham se zindānī hazāroñ lākhoñ

aao sab ke liye duniyā dekheñ

aao is koh ko tasḳhīr kareñ

jis ke pare

sub.h kā rañg hai

aur rañg kī tanvīreñ haiñ

aao tanvīroñ ko āñkhoñ se nahīñ saare badan se dekheñ

kya faqat dekhte rahne se masail ki girah khulti hai

kya faqat aankh ki putli mein hai mahfuz KHudai sari

hum ki insan nahin aankhen hain

hum ne aankhon ko KHuda samjha KHudai jaana

aaina dekha to in aankhon ne KHud ko bhi nahin pahchana

dekhte dekhte pathra gain donon aankhen

phir bhi chehra na nazar aaya kahin

phir bhi dekhe nahin dast-o-bazu

jaan kar hum ne har ek chiz se inkar kiya

zat se

zat ke gard KHudai ke manazir se

manazir mein chhupi sadiyon ki mazlum tamannaon se

phoD do dekhne wali aankhen

hum tamashai nahin khel ke kirdar bhi hain

apne kirdar ke zindan mein giraftar bhi hain

hum se zindani hazaron lakhon

aao sab ke liye duniya dekhen

aao is koh ko tasKHir karen

jis ke pare

subh ka rang hai

aur rang ki tanwiren hain

aao tanwiron ko aankhon se nahin sare badan se dekhen