hamare des ki barsat

vo kaale kaale bādal har taraf ghir ghir ke chhāte haiñ

falak par ḳhushnumā ik shāmiyāna sā sajāte haiñ

garaj kar apnī aamad ke vo naqqāre bajāte haiñ

vo ban kar barq partav qudrat-e-haq kā dikhāte haiñ

vo kaisī un kī dilkash dilrubāyāna ravānī hai

hamāre des kī barsāt bhī kaisī suhānī hai

havāoñ kā vo chal-chal kar kalī dil kī khilā denā

vo ġhunchoñ kā masarrat se uchhal kar muskurā denā

vo pattoñ kā ḳhushī se jhuum kar taalī bajā denā

vo manzar ik nayā bārish kī aamad kā dikhā denā

vo bādal haiñ vo bijlī hai vo sabza hai vo paanī hai

hamāre des kī barsāt bhī kaisī suhānī hai

vo nannhī-nannhī būñdoñ kā vo halkī phuvār kā aanā

vo garmī kī tapish meñ sardiyoñ kā lutf dikhlānā

vo koyal kā chaman meñ kūknā qumrī kā itrānā

vo moroñ kā thiraknā aur papīhoñ kā vo pī gaanā

ġharaz har-har taraf aish-o-tarab hai shādmānī hai

hamāre des kī barsāt bhī kaisī suhānī hai

vo gulzāroñ meñ jhūle vo suhāne dil-fazā gaane

ḳhushī ke chahchahe vo qahqahe sakhiyoñ ke mastāne

vo pakvānoñ kī lazzat vo maze ke chaTpaTe khāne

vo yāroñ dostoñ kī shoḳhiyāñ ulfat ke afsāne

vo chuhleñ yaad bhī jin kī surūr-e-zindagānī hai

hamāre des kī barsāt bhī kaisī suhānī hai

vo dariyāoñ ke tūfān aur vo shorish ābshāroñ kī

suhāne giit chashmoñ ke vo ḳhushbū sabza-zāroñ kī

harī maḳhmal kī pyārī vardiyāñ vo kohsāroñ kī

ye manzar dekh kar vo chashmakeñ phir chāñd tāroñ kī

muqābil jin ke aakar kahkashāñ ne haar maanī hai

hamāre des kī barsāt bhī kaisī suhānī hai

ḳhudā vo din kare aise bhī din is des ke aa.eñ

vatan ke rahne vaale ek dil aapas meñ ho jaa.eñ

mohabbat kā vo ban kar abr saare des par chhā.eñ

mohabbat hī ke motī ban ke har jānib baras jaa.eñ

kaheñ phir mil ke ham allāh kī ye mehrbānī hai

hamāre des kī barsāt bhī kaisī suhānī hai

mazā ho mehr aur ulfat kā bādal har taraf chhā.e

mazā jab ho mohabbat hī kā naġhma kaan meñ aa.e

fasādoñ aur jhagḌoñ kā ye dukh har qalb se jaa.e

mazā jab ho ki har chhoTā-baḌā ye sher dohrā.e

bas apnā kaam ab 'nayyar' vatan kī pāsbānī hai

hamāre des kī barsāt bhī kaisī suhānī hai

wo kale kale baadal har taraf ghir ghir ke chhate hain

falak par KHushnuma ek shamiyana sa sajate hain

garaj kar apni aamad ke wo naqqare bajate hain

wo ban kar barq partaw qudrat-e-haq ka dikhate hain

wo kaisi un ki dilkash dilrubayana rawani hai

hamare des ki barsat bhi kaisi suhani hai

hawaon ka wo chal-chal kar kali dil ki khila dena

wo ghunchon ka masarrat se uchhal kar muskura dena

wo patton ka KHushi se jhum kar tali baja dena

wo manzar ek naya barish ki aamad ka dikha dena

wo baadal hain wo bijli hai wo sabza hai wo pani hai

hamare des ki barsat bhi kaisi suhani hai

wo nannhi-nannhi bundon ka wo halki phuwar ka aana

wo garmi ki tapish mein sardiyon ka lutf dikhlana

wo koyal ka chaman mein kukna qumri ka itrana

wo moron ka thirakna aur papihon ka wo pi gana

gharaz har-har taraf aish-o-tarab hai shadmani hai

hamare des ki barsat bhi kaisi suhani hai

wo gulzaron mein jhule wo suhane dil-faza gane

KHushi ke chahchahe wo qahqahe sakhiyon ke mastane

wo pakwanon ki lazzat wo maze ke chaTpaTe khane

wo yaron doston ki shoKHiyan ulfat ke afsane

wo chuhlen yaad bhi jin ki surur-e-zindagani hai

hamare des ki barsat bhi kaisi suhani hai

wo dariyaon ke tufan aur wo shorish aabshaaron ki

suhane git chashmon ke wo KHushbu sabza-zaron ki

hari maKHmal ki pyari wardiyan wo kohsaron ki

ye manzar dekh kar wo chashmaken phir chand taron ki

muqabil jin ke aakar kahkashan ne haar mani hai

hamare des ki barsat bhi kaisi suhani hai

KHuda wo din kare aise bhi din is des ke aaen

watan ke rahne wale ek dil aapas mein ho jaen

mohabbat ka wo ban kar abr sare des par chhaen

mohabbat hi ke moti ban ke har jaanib baras jaen

kahen phir mil ke hum allah ki ye mehrbani hai

hamare des ki barsat bhi kaisi suhani hai

maza ho mehr aur ulfat ka baadal har taraf chhae

maza jab ho mohabbat hi ka naghma kan mein aae

fasadon aur jhagDon ka ye dukh har qalb se jae

maza jab ho ki har chhoTa-baDa ye sher dohrae

bas apna kaam ab 'nayyar' watan ki pasbani hai

hamare des ki barsat bhi kaisi suhani hai