hamare din guzar gae

gharoñ meñ koī peḌ hai na motiye kī bail hai

na daal ko baghārtī huī javān laḌkiyāñ

ki sab chalan badal gayā

farāġhatoñ ke din ga.e

ga.iiñ vo kunj-e-vaqt kī safed riish sā.ateñ

shajar kī rāhdāriyāñ ujaḌ ga.iiñ

ghanī dopahar meñ khulī khulī sī dhuup kā safar bhī ruk gayā

galī ke surḳh moḌ par

kanār-e-shām nuqra.ī libās meñ jamāltī huī sharīr apsarā nahīñ rahī

vo riish meñ guñdhe hue

badan kā ḳham zamīn par utārte hue za.iif lāThiyoñ pe Dolte

ḳhamīda sar nahīñ rahe

vo tyroñ se kheltā ġhubār uḌātā bachpanā

vo sāñvle hijāb meñ safed muskurāhaTeñ

hayā kī sabz katraneñ ki jin pe surḳh motiyoñ kā nīlgūñ lihāf thā

na-jāne kaun samt haiñ

jale bujhe se diip haiñ nazar kī rahguzār meñ

zarā zarā sī raushnī ki jis meñ ḳhaam ujlateñ

badan ke daaġh sīñchtīñ

jhuke jhuke mizāj par tanī tanī sī uljhaneñ

dalīl se varā hai saarī guftugū kā sāneha

zarā zarā sī zindagī baḌā baḌā sā ḳhauf hai

laboñ ke surḳh baam par malāl-e-raftagāñ nahīñ

firāsatoñ kā qaht hai

malāmatoñ kā ahd hai

hameñ fareb-e-zindagī zarā sā kaam kyā paḌā

hamāre din guzar ga.e

gharon mein koi peD hai na motiye ki bail hai

na dal ko baghaarti hui jawan laDkiyan

ki sab chalan badal gaya

faraghaton ke din gae

gain wo kunj-e-waqt ki safed rish saaten

shajar ki rahdariyan ujaD gain

ghani dopahar mein khuli khuli si dhup ka safar bhi ruk gaya

gali ke surKH moD par

kanar-e-sham nuqrai libas mein jamalti hui sharir apsara nahin rahi

wo rish mein gundhe hue

badan ka KHam zamin par utarte hue zaif laThiyon pe Dolte

KHamida sar nahin rahe

wo tyron se khelta ghubar uData bachpana

wo sanwle hijab mein safed muskurahaTen

haya ki sabz katranen ki jin pe surKH motiyon ka nilgun lihaf tha

na-jaane kaun samt hain

jale bujhe se dip hain nazar ki rahguzar mein

zara zara si raushni ki jis mein KHam ujlaten

badan ke dagh sinchtin

jhuke jhuke mizaj par tani tani si uljhanen

dalil se wara hai sari guftugu ka saneha

zara zara si zindagi baDa baDa sa KHauf hai

labon ke surKH baam par malal-e-raftagan nahin

firasaton ka qaht hai

malamaton ka ahd hai

hamein fareb-e-zindagi zara sa kaam kya paDa

hamare din guzar gae