hamare sans jhuTe hain

madār-e-vaqt se ik jur.a-e-nāyāb lete haiñ

yūñhī jiite chale jaate haiñ bas lamhoñ kī dhaḌkan meñ

ḳhizāñ kā giit sunte haiñ

bahār-e-zindagānī meñ

ḳhumār-e-rā.egānī meñ

hamāre paañv raste māpte haiñ shahr-o-sahrā ke

magar manzil nahīñ miltī

safar to jaarī rahtā hai

phir āḳhir ek din jab vaqt bāgeñ khīñch letā hai

to khultā hai

isī bahte hue dariyā meñ apne ḳhvāb kā sonā bikharnā hai

hamāre jism kā saudā isī miTTī se honā hai

fanā kā zā.iqa chakhte hue

is qulzum-e-hastī meñ ham ko Duub jaanā hai

jise jīvan samajhte the sarāsar ek dhokā hai

yahī lamha bhabhūkā hai

madar-e-waqt se ek jura-e-nayab lete hain

yunhi jite chale jate hain bas lamhon ki dhaDkan mein

KHizan ka git sunte hain

bahaar-e-zindagani mein

KHumar-e-raegani mein

hamare panw raste mapte hain shahr-o-sahra ke

magar manzil nahin milti

safar to jari rahta hai

phir aaKHir ek din jab waqt bagen khinch leta hai

to khulta hai

isi bahte hue dariya mein apne KHwab ka sona bikharna hai

hamare jism ka sauda isi miTTi se hona hai

fana ka zaiqa chakhte hue

is qulzum-e-hasti mein hum ko Dub jaana hai

jise jiwan samajhte the sarasar ek dhoka hai

yahi lamha bhabhuka hai