hamari billi ke bachche

suno ek chhoTī kahānī suno

kahānī ye merī zabānī suno

jo kal apnī billī ne bachche diye

vo gintī meñ pūchho to bas pāñch the

baḌī der tak ham ye sochā kiye

ki naam in kā kyā kyā rakhā chāhiye

machāyā to pahle baḌā shor-o-shar

hue phir razā-mand is baat par

kareñ aao ham in kī gintī se jāñch

kaheñ ek do tiin chaar aur pāñch

vo hai ek number jo sab se safed

faqat rang se paa.eñ ham us kā bhed

jo hai sab se lambā vo hai dūsrā

chamakdār sab se jo hai tīsrā

jo hai sab se chhoTā kaheñ us ko chaar

kareñ pāñchvāñ āḳhirī ham shumār

mile shakl do tiin se pāñch kī

gulābī sī naak un kī hai ek sī

siyah daaġh bhī piiTh par ek se

sabhī ek jaisī haiñ moñchheñ liye

ye khā khā ke sote raheñ baar baar

hamesha ye nīñdoñ kī lūTeñ bahār

ye chhoTā sā kumba sadā ḳhush rahe

koī jā ke in ko kabhī dekh le

chatā.ī pe pān.cho ye leTe raheñ

sabhī god se maañ kī chimTe raheñ

suno ek chhoTi kahani suno

kahani ye meri zabani suno

jo kal apni billi ne bachche diye

wo ginti mein puchho to bas panch the

baDi der tak hum ye socha kiye

ki nam in ka kya kya rakha chahiye

machaya to pahle baDa shor-o-shar

hue phir raza-mand is baat par

karen aao hum in ki ginti se jaanch

kahen ek do tin chaar aur panch

wo hai ek number jo sab se safed

faqat rang se paen hum us ka bhed

jo hai sab se lamba wo hai dusra

chamakdar sab se jo hai tisra

jo hai sab se chhoTa kahen us ko chaar

karen panchwan aaKHiri hum shumar

mile shakl do tin se panch ki

gulabi si nak un ki hai ek si

siyah dagh bhi piTh par ek se

sabhi ek jaisi hain monchhen liye

ye kha kha ke sote rahen bar bar

hamesha ye nindon ki luTen bahaar

ye chhoTa sa kumba sada KHush rahe

koi ja ke in ko kabhi dekh le

chatai pe pancho ye leTe rahen

sabhi god se man ki chimTe rahen