hamal-sara

dādī-ammāñ...

(bastī ke sab se mumtāz

gharāne kī beTii...

sab se muazzaz

āñgan kī dulhan

māshā-allāh

sattar ke piiTe meñ hoñgī)

apnaa... istehqāq māñgtī haiñ

daadā jaan ki

das kam saaTh baras tak un se

andhī ghup kaalī rātoñ meñ

chhup chhup ke milne aa.e

biivī kī zarḳhez āñkhoñ meñ

sirf aulād-e-narīna ke

ḳhvāb ugā ke chale ga.e...

ye shauhar ke raste meñ

haa.el na huiiñ

dil ke TukḌe

hosteloñ meñ pale-baḌhe

haif ki un ke dukh-sukh meñ

shāmil na huiiñ

dādā-jān kī saḳht tabī.at ne

is kā mauqa.a hī na diyā

ye vo nātiq

jo ḳhāmosh rahīñ...

is nā-zebā ḳhāmoshī meñ

aag lagāne ke din aa.e

ab apne chaqmāq māñgtī haiñ...

un ke andar tanhā.ī kā zahr utartā chalā gayā

(aur zamāna

ird-gard se

parchhā.īñ kī tarah guzartā chalā gayā)

sog meñ haiñ,

tiryāq māñgtī haiñ....

ek janam tak

andhī gūñgī bahrī ban ke

apne hī ghar meñ be-daḳhl,

be-qadrī ke saḳhī-hasan meñ dafn rahīñ

aaj na.e āfāq māñgtī haiñ

daadī amaañ talāq māñgtī haiñ

dadi-amman

(basti ke sab se mumtaz

gharane ki beTi

sab se muazzaz

aangan ki dulhan

masha-allah

sattar ke piTe mein hongi)

apna istehqaq mangti hain

dada jaan ki

das kam saTh baras tak un se

andhi ghup kali raaton mein

chhup chhup ke milne aae

biwi ki zarKHez aankhon mein

sirf aulad-e-narina ke

KHwab uga ke chale gae

ye shauhar ke raste mein

hael na huin

dil ke TukDe

hostelon mein pale-baDhe

haif ki un ke dukh-sukh mein

shamil na huin

dada-jaan ki saKHt tabiat ne

is ka mauqa hi na diya

ye wo natiq

jo KHamosh rahin

is na-zeba KHamoshi mein

aag lagane ke din aae

ab apne chaqmaq mangti hain

un ke andar tanhai ka zahr utarta chala gaya

(aur zamana

ird-gard se

parchhain ki tarah guzarta chala gaya)

sog mein hain,

tiryaq mangti hain

ek janam tak

andhi gungi bahri ban ke

apne hi ghar mein be-daKHl,

be-qadri ke saKHi-hasan mein dafn rahin

aaj nae aafaq mangti hain

dadi aman talaq mangti hain