hamdam

zindagī bojh sahī bojh kā ehsās na kar

manzileñ duur sahī us kā taraddud be-kār

jab qadam azm se uTheñge to rasta tai hai

aur phir raah meñ kāñToñ ke sivā

narmī-e-gul bhī to maujūd hai sabza bhī hai

chalte chalte yūñhī aadat bhī huī jaatī hai

thak ga.e hoñ to yahāñ chhāñv bhī saaya bhī hai

garmī-e-mahr satātī hai magar yuuñ bhī to hai

raushnī tezī-e-raftār pe uksātī hai

raat tārīk hai sunsān hai Dar lagtā hai

raat kā ruup faqat ye to nahīñ hai hamdam

raat mahtāb kī khetī hai sitāroñ kā chaman

raat ke shahar meñ ḳhvāboñ kī fusūñ-kārī hai

ḳhvāb jo koshish-e-paiham ko jagā dete haiñ

aur phir raat guzar jaatī hai

sub.h-e-ḳhurshīd kā chhalkā huā paimāna hai

rañg aur kaif kī sarshār mizājī kī qasam

manzileñ sahal huī jaatī haiñ

us taraf dekh makānoñ kī jabīnoñ se dhuāñ uThtā hai

aur raushan hai bisāt

aur makīnoñ ke tabassum se fazā.eñ māmūr

ek lamhe ke liye

ruk ke ḳhushiyoñ ko ikaTThā kar leñ

zād-e-rah in ko banā leñ apnā

partav-e-zīst se zulmat meñ ujālā kar leñ

ġham nahīñ qāfile vāloñ se bichhaḌ jaane kā

ham na.ī raah na.e naqsh-e-qadam chhoḌeñge

kārvāñ aur bhī guzreñge hamāre pīchhe

shaam se pahle bahut duur pahuñchnā hai hameñ

zindagi bojh sahi bojh ka ehsas na kar

manzilen dur sahi us ka taraddud be-kar

jab qadam azm se uThenge to rasta tai hai

aur phir rah mein kanTon ke siwa

narmi-e-gul bhi to maujud hai sabza bhi hai

chalte chalte yunhi aadat bhi hui jati hai

thak gae hon to yahan chhanw bhi saya bhi hai

garmi-e-mahr satati hai magar yun bhi to hai

raushni tezi-e-raftar pe uksati hai

raat tarik hai sunsan hai Dar lagta hai

raat ka rup faqat ye to nahin hai hamdam

raat mahtab ki kheti hai sitaron ka chaman

raat ke shahar mein KHwabon ki fusun-kari hai

KHwab jo koshish-e-paiham ko jaga dete hain

aur phir raat guzar jati hai

subh-e-KHurshid ka chhalka hua paimana hai

rang aur kaif ki sarshaar mizaji ki qasam

manzilen sahal hui jati hain

us taraf dekh makanon ki jabinon se dhuan uThta hai

aur raushan hai bisat

aur makinon ke tabassum se fazaen mamur

ek lamhe ke liye

ruk ke KHushiyon ko ikaTTha kar len

zad-e-rah in ko bana len apna

partaw-e-zist se zulmat mein ujala kar len

gham nahin qafile walon se bichhaD jaane ka

hum nai rah nae naqsh-e-qadam chhoDenge

karwan aur bhi guzrenge hamare pichhe

sham se pahle bahut dur pahunchna hai hamein