haq-pasandi

mujhe pasand hai kyoñ merī shām-e-tanhā.ī

ye mujh se koī na pūchhe ki maiñ batā na sakūñ

ki apne aap pe mujh ko bhī e'timād nahīñ

kisī ne jab bhī koī baat mujh se pūchhī hai

daroġh maslahat-āmez se liyā hai kaam

kahā hai ashk ko shabnam to daaġh ko laala

kabhī savād-e-shab-e-ġham ko nuur kā haala

maiñ apne ḳhol se niklūñ to kis tarah niklūñ

zarūr hogī sar-e-bazm merī rusvā.ī

dikhā.ūñ dāġh-e-uyūb-e-barahnagī kyūñkar

maiñ sab ke sāmne nang-e-vajūd kahlā.ūñ

na hogī mujh se ye laġhzish mujhe mu'āf karo

zamāna ab bhī mujhe hosh-mand kahtā hai

naqīb-e-sidq-o-safā haq-pasand kahtā hai

mujhe pasand hai kyon meri sham-e-tanhai

ye mujh se koi na puchhe ki main bata na sakun

ki apne aap pe mujh ko bhi e'timad nahin

kisi ne jab bhi koi baat mujh se puchhi hai

darogh maslahat-amez se liya hai kaam

kaha hai ashk ko shabnam to dagh ko lala

kabhi sawad-e-shab-e-gham ko nur ka haala

main apne KHol se niklun to kis tarah niklun

zarur hogi sar-e-bazm meri ruswai

dikhaun dagh-e-uyub-e-barahnagi kyunkar

main sab ke samne nang-e-wajud kahlaun

na hogi mujh se ye laghzish mujhe mu'af karo

zamana ab bhi mujhe hosh-mand kahta hai

naqib-e-sidq-o-safa haq-pasand kahta hai