haqiqat-o-afsana

tirī palkeñ tirī āñkheñ tire abrū kī lachak

tirī qāmat kī darāzī tirī zulfoñ kī mahak

tire altāf kā aalam tirī qurbat kā jamāl

tire hoñToñ kī ḳhamoshī tirī āñkhoñ ke savāl

ik chamaktā huā sho.ala tirā rangīn badan

ik taḌaptī huī bijlī tirī āñkhoñ kī kiran

ek taptā huā sahrā tirī duurī kā ḳhayāl

ek mahkā huā gulshan hai tirā roz-e-visāl

ek chaḌhtā huā dariyā hai tū ik bahtī naav

tere siine kā tamavvuj tire qāmat kā bahāo

tire andāz kā jaadū tire ishvoñ kā fusūñ

sab ke sab ban ga.e mere liye sāmān-e-junūñ

tere aġhmāz meñ pinhāñ hai mohabbat kī jhalak

lab-e-iqrār pe inkār kā pahra kab tak

chhiḌ ga.ī hai jo kabhī pairahan-e-chust kī baat

phir ga.ī hai mirī āñkhoñ meñ shagūfe kī zaat

mere har ek ishāre ko samajhne vaalā

qulzum-e-vaqt ke dhāre ko samajhne vaalā

mere har naaz ko āñkhoñ pe biThāyā tū ne

mere andāz ko siine se lagāyā tū ne

mere atvār ke sāñche meñ ba-sad-shauq Dhalā

ātish-e-ġham meñ mire vāste chup-chāp jalā

merī ḳhātir ġham-e-dūrī bhī gavārā hai tujhe

mere iḳhlās kā duniyā meñ sahārā hai tujhe

merī har baat hai tere liye qānūn-e-hayāt

terā mehvar hai zamāne meñ faqat merī zaat

aisā ma.asūm koī aur zamāne meñ kahāñ

itnī sachchā.ī kisī aur fasāne meñ kahāñ

teri palken teri aankhen tere abru ki lachak

teri qamat ki daraazi teri zulfon ki mahak

tere altaf ka aalam teri qurbat ka jamal

tere honTon ki KHamoshi teri aankhon ke sawal

ek chamakta hua shoala tera rangin badan

ek taDapti hui bijli teri aankhon ki kiran

ek tapta hua sahra teri duri ka KHayal

ek mahka hua gulshan hai tera roz-e-visal

ek chaDhta hua dariya hai tu ek bahti naw

tere sine ka tamawwuj tere qamat ka bahao

tere andaz ka jadu tere ishwon ka fusun

sab ke sab ban gae mere liye saman-e-junun

tere aghmaz mein pinhan hai mohabbat ki jhalak

lab-e-iqrar pe inkar ka pahra kab tak

chhiD gai hai jo kabhi pairahan-e-chust ki baat

phir gai hai meri aankhon mein shagufe ki zat

mere har ek ishaare ko samajhne wala

qulzum-e-waqt ke dhaare ko samajhne wala

mere har naz ko aankhon pe biThaya tu ne

mere andaz ko sine se lagaya tu ne

mere atwar ke sanche mein ba-sad-shauq Dhala

aatish-e-gham mein mere waste chup-chap jala

meri KHatir gham-e-duri bhi gawara hai tujhe

mere iKHlas ka duniya mein sahaara hai tujhe

meri har baat hai tere liye qanun-e-hayat

tera mehwar hai zamane mein faqat meri zat

aisa masum koi aur zamane mein kahan

itni sachchai kisi aur fasane mein kahan