har roz hum apne KHwabon ki tauhin karen

ham roz ham apne ḳhvāboñ kī tauhīn kareñ

vo ḳhvāb

jo apne pal-pal kī us raakh se ham ta.amīr kareñ

jab dil meñ dard bagūla ban kar uThtā hai

siine meñ ghar kā sannāTā

āñkhoñ meñ vahshat boltī hai

jab paañv meñ āvārgī kī zambīl liye

ham dhuāñ uḌātī bastī meñ

tanhā āvāra phirte haiñ

aur chehroñ ke sailāb meñ tujh ko DhūñDte haiñ

jab vīrāñ ghar

zaḳhmī āñgan

nāsūr baraste lahje meñ fariyād kareñ

jab bachche zard dopahroñ meñ

ik dhuup kī chādar taan ke sar par naach kareñ

ham aisī zard dopahroñ meñ

jab dukh kī raakh barastī hai

is raakh ko terī yaad ke zevar pahnā kar

rātoñ ko ḳhvāb pirote haiñ

aur dūsrī sub.h

vo ḳhvāb anā kī thaal meñ rakh

majrūh pindār ke hāthoñ

tere qadmoñ pe ham Dālte haiñ

vo ḳhvāb jo apne pal-pal kī is raakh se ham ta.amīr kareñ

har roz ham apne ḳhvāboñ kī tauhīn kareñ

hum roz hum apne KHwabon ki tauhin karen

wo KHwab

jo apne pal-pal ki us rakh se hum tamir karen

jab dil mein dard bagula ban kar uThta hai

sine mein ghar ka sannaTa

aankhon mein wahshat bolti hai

jab panw mein aawargi ki zambil liye

hum dhuan uDati basti mein

tanha aawara phirte hain

aur chehron ke sailab mein tujh ko DhunDte hain

jab viran ghar

zaKHmi aangan

nasur baraste lahje mein fariyaad karen

jab bachche zard dopahron mein

ek dhup ki chadar tan ke sar par nach karen

hum aisi zard dopahron mein

jab dukh ki rakh barasti hai

is rakh ko teri yaad ke zewar pahna kar

raaton ko KHwab pirote hain

aur dusri subh

wo KHwab ana ki thaal mein rakh

majruh pindar ke hathon

tere qadmon pe hum Dalte hain

wo KHwab jo apne pal-pal ki is rakh se hum tamir karen

har roz hum apne KHwabon ki tauhin karen