hasin duniya ujaD gai to

hasīn duniyā ujaḌ ga.ī to agar kahīñ ye bigaḌ ga.ī to

gumāñ se aage nikal ga.ī to gumāñ se aage gumān kar lo

uThāo parda aur dekh lo ḳhud zamīñ-faroshī ke ruup kitne

naqāb-poshoñ kī bhiiḌ meñ sab hamāre kal ke ye saudāgar haiñ

un hī kī hirs-o-havas ke baa.is hamārī duniyā ujaḌ rahī hai

garm havāoñ meñ ghir rahī hai

badalte mausam kā isti.āra zamīñ ko tārāj kar rahā hai

pahāḌ-o-dariyā nigalne vaale shajar-faroshī meñ lag ga.e haiñ

vo ḳhushnumā giit gaate panchhī ab apne raste badal rahe haiñ

shikārī āñkhoñ se bach rahe haiñ

ye dariyā garmī se jal rahe haiñ pahāḌ karvaT badal rahe haiñ

zamīñ kā zevar utar rahā hai aur jañgaloñ meñ ġhadar machā hai

sulagte sahrā basāne vaalo nirālī duniyā sajāne vaalo

samundaroñ par shahr banāo falak pe tum kahkashāñ sajāo jahān-e-nau ḳhūb-tar basāo

magar zamīñ ko na bhuul jaanā luTā rahī hai jo āb-o-dāna

hasīn duniyā ujaḌ ga.ī to agar kahīñ ye bigaḌ ga.ī to gumāñ se aage nikal ga.ī to

na tum rahoge na ham raheñge na mausamoñ ke ye rañg raheñge

hasin duniya ujaD gai to agar kahin ye bigaD gai to

guman se aage nikal gai to guman se aage guman kar lo

uThao parda aur dekh lo KHud zamin-faroshi ke rup kitne

naqab-poshon ki bhiD mein sab hamare kal ke ye saudagar hain

un hi ki hirs-o-hawas ke bais hamari duniya ujaD rahi hai

garm hawaon mein ghir rahi hai

badalte mausam ka istiara zamin ko taraj kar raha hai

pahaD-o-dariya nigalne wale shajar-faroshi mein lag gae hain

wo KHushnuma git gate panchhi ab apne raste badal rahe hain

shikari aankhon se bach rahe hain

ye dariya garmi se jal rahe hain pahaD karwaT badal rahe hain

zamin ka zewar utar raha hai aur jangalon mein ghadar macha hai

sulagte sahra basane walo nirali duniya sajaane walo

samundaron par shahr banao falak pe tum kahkashan sajao jahan-e-nau KHub-tar basao

magar zamin ko na bhul jaana luTa rahi hai jo aab-o-dana

hasin duniya ujaD gai to agar kahin ye bigaD gai to guman se aage nikal gai to

na tum rahoge na hum rahenge na mausamon ke ye rang rahenge