hawa ab chal paDi hai

saltanat ke zañg-ḳhurda āhanī mahbas meñ ik ḳhilqat chhupī hai

beḌiyoñ aur beḌiyoñ se eḌiyoñ par paḌne vaale zaḳhm kī aadī

ye ik bīmār ḳhilqat

āhanī kanTop se sar ko Dhake

mahbas kī dīvāroñ pe apne nāḳhunoñ se

aaḌī TeḌhī tirchhī lakīreñ khurachtī

shaah kī tausīf meñ ġhaltāñ

razā raġhbat se shadd-o-mad se masrūf-e-amal hai

aur agar taaza havā kā koī jhoñkā

jab kabhī mahbas meñ dar aa.e

to ye ḳhilqat bilaktī sarsarātī sī mirī āvāz meñ

sargoshiyoñ meñ

muḳhbirī kartī hai in taaza havāoñ kī

pas-e-zindāñ sipāhī

zañg-ḳhurda āhanī mahbas kī dīvāroñ se

apne kaan joḌe muḳhbirī ke muntazir

taaza havā ke narm jhoñke kī giraftārī raqam karne ko bas tayyār baiThe haiñ

ḳhabar de do

havā ko qaid karnā is qadar āsāñ nahīñ hai

ye agar chaltī hai to

koh-e-girāñ ko kaaT detī hai

kisī dīmak-zada būḌhe shajar ko

us kī jaḌ se hī uThā kar pheñk detī hai

havā tūfān ban jaa.e to sab kuchh hī ḳhas-o-ḳhāshāk kartī hai

ḳhabar de do

havā ab chal paḌī hai

saltanat ke āhanī mahbas ke qaidī

muḳhbirī karne meñ pīchhe rah ga.e haiñ

aur giraftārī ke ḳhvāhish-mand

vo saare sipāhī thak chuke haiñ

āhanī mahbas kī dīvāroñ meñ raḳhne ho chuke haiñ

aur havā sargoshiyoñ se

tez-tar atrāf meñ hadd-e-nazar tak

ab musalsal phailtī hī jā rahī hai

.

ye ḳhabar de do

havā ko qaid karnā is qadar āsāñ nahīñ hai

havā ab chal paḌī hai

saltanat ke zang-KHurda aahani mahbas mein ek KHilqat chhupi hai

beDiyon aur beDiyon se eDiyon par paDne wale zaKHm ki aadi

ye ek bimar KHilqat

aahani kanTop se sar ko Dhake

mahbas ki diwaron pe apne naKHunon se

aaDi TeDhi tirchhi lakiren khurachti

shah ki tausif mein ghaltan

raza raghbat se shadd-o-mad se masruf-e-amal hai

aur agar taza hawa ka koi jhonka

jab kabhi mahbas mein dar aae

to ye KHilqat bilakti sarsaraati si meri aawaz mein

sargoshiyon mein

muKHbiri karti hai in taza hawaon ki

pas-e-zindan sipahi

zang-KHurda aahani mahbas ki diwaron se

apne kan joDe muKHbiri ke muntazir

taza hawa ke narm jhonke ki giraftari raqam karne ko bas tayyar baiThe hain

KHabar de do

hawa ko qaid karna is qadar aasan nahin hai

ye agar chalti hai to

koh-e-giran ko kaT deti hai

kisi dimak-zada buDhe shajar ko

us ki jaD se hi uTha kar phenk deti hai

hawa tufan ban jae to sab kuchh hi KHas-o-KHashak karti hai

KHabar de do

hawa ab chal paDi hai

saltanat ke aahani mahbas ke qaidi

muKHbiri karne mein pichhe rah gae hain

aur giraftari ke KHwahish-mand

wo sare sipahi thak chuke hain

aahani mahbas ki diwaron mein raKHne ho chuke hain

aur hawa sargoshiyon se

tez-tar atraf mein hadd-e-nazar tak

ab musalsal phailti hi ja rahi hai

ye KHabar de do

hawa ko qaid karna is qadar aasan nahin hai

hawa ab chal paDi hai