hawwa ki beTi

shiddat-e-iflās se jab zindagī thī tujh pe tañg

ishtihā ke saath thī jab ġhairat o ismat kī jañg

ghaat meñ terī rahā ye ḳhud-ġharaz sarmāya-dār

kheltā hai jo barābar nau-e-insāñ kā shikār

rafta rafta luuT lī terī matā-e-ābrū

ḳhuub chūsā terī rag rag se javānī kā lahū

khelte haiñ aaj bhī tujh se yahī sarmāya-dār

ye tamaddun ke ḳhudā tahzīb ke parvardigār

sāmne duniyā ke tuf karte haiñ tere naam par

ḳhalvatoñ meñ jo tire qadmoñ pe rakh dete haiñ sar

rāste meñ din ko le sakte nahīñ terā salām

raat ko jo tere hāthoñ se chaḌhā jaate haiñ jaam

tere kūcha se jinheñ ho kar guzarnā hai gunāh

garm un kī saañs se rahtī hai terī ḳhvāb-gāh

mahfiloñ meñ tujh se kar sakte nahīñ jo guftugū

tere āñchal meñ bañdhī hai un kī jhūTī aabrū

peT kī ḳhātir agar tū bechtī hai jism aaj

kaun hai nafrat se tujh ko dekhne vaalā samāj

shiddat-e-iflas se jab zindagi thi tujh pe tang

ishtiha ke sath thi jab ghairat o ismat ki jang

ghat mein teri raha ye KHud-gharaz sarmaya-dar

khelta hai jo barabar nau-e-insan ka shikar

rafta rafta luT li teri mata-e-abru

KHub chusa teri rag rag se jawani ka lahu

khelte hain aaj bhi tujh se yahi sarmaya-dar

ye tamaddun ke KHuda tahzib ke parwardigar

samne duniya ke tuf karte hain tere nam par

KHalwaton mein jo tere qadmon pe rakh dete hain sar

raste mein din ko le sakte nahin tera salam

raat ko jo tere hathon se chaDha jate hain jam

tere kucha se jinhen ho kar guzarna hai gunah

garm un ki sans se rahti hai teri KHwab-gah

mahfilon mein tujh se kar sakte nahin jo guftugu

tere aanchal mein bandhi hai un ki jhuTi aabru

peT ki KHatir agar tu bechti hai jism aaj

kaun hai nafrat se tujh ko dekhne wala samaj