hawwa ki beTi

suno aisā bhī kabhī hotā hai kyā

ki chhe rātoñ pe ek khiḌkī se

tiin mausam utre hoñ

aur sātveñ din kī bhārī raat meñ

āsmānī balā.eñ

kā.enāt ke mukammal hone ke dukh meñ

shab-e-hijr manātī hoñ

chhe din ḳhudā ne merī miTTī ko gūñdhā

aur sātvīñ raat mujhe

saañs phūñk kar duniyā ke havāle kar diyā gayā

duniyā jis meñ saat rang qaus-o-quzah ke

aur āTHvāñ rang bahār

bhañvaroñ ke nathunoñ se ho kar

zahrīlā ras banāte haiñ

jo mohabbat ke naam par

fursat kī ḳhālī shīshiyoñ meñ

bhar bhar kar muft bāñTā jaatā hai

ras bhare jhūToñ kā zā.iqa chakh chakh kar

sach mere vajūd meñ matlī kī tarah tairtā hai

jab bhī yuuñ hī khiḌkī se mausam utarte haiñ

mere jism se soñdhī miTTī kī ḳhushbū uThtī rahtī hai

aur har chhaTe din kī sātveñ raat kā

tavāf mukammal hone par

hijr merī āñkhoñ ko chuum chuum kar

sang-e-siyāh banā detā hai

bolo aisā bhī kabhī hotā hai kyā

ki patthar āñkhoñ se

kāñch kī khiḌkī ke paar

utarte mausamoñ kī badaltī rutoñ ko dekhā jā sake

to kyuuñ na phir āfāqī balāoñ kī saf meñ sharīk ho kar

kā.enātī shab-e-hijrāñ kā abadī mātam manāyā jaa.e

suno aisa bhi kabhi hota hai kya

ki chhe raaton pe ek khiDki se

tin mausam utre hon

aur satwen din ki bhaari raat mein

aasmani balaen

kaenat ke mukammal hone ke dukh mein

shab-e-hijr manati hon

chhe din KHuda ne meri miTTi ko gundha

aur satwin raat mujhe

sans phunk kar duniya ke hawale kar diya gaya

duniya jis mein sat rang qaus-o-quzah ke

aur aaTHwan rang bahaar

bhanwaron ke nathunon se ho kar

zahrila ras banate hain

jo mohabbat ke nam par

fursat ki KHali shishiyon mein

bhar bhar kar muft banTa jata hai

ras bhare jhuTon ka zaiqa chakh chakh kar

sach mere wajud mein matli ki tarah tairta hai

jab bhi yun hi khiDki se mausam utarte hain

mere jism se sondhi miTTi ki KHushbu uThti rahti hai

aur har chhaTe din ki satwen raat ka

tawaf mukammal hone par

hijr meri aankhon ko chum chum kar

sang-e-siyah bana deta hai

bolo aisa bhi kabhi hota hai kya

ki patthar aankhon se

kanch ki khiDki ke par

utarte mausamon ki badalti ruton ko dekha ja sake

to kyun na phir aafaqi balaon ki saf mein sharik ho kar

kaenati shab-e-hijran ka abadi matam manaya jae