hijr aur visal

huuk uThtī hai

jalā detī hai jism-o-jāñ ko

dil laraz uThtā hai

āñkhoñ se dhuāñ uThtā hai

ye dhuāñ

hijr kā tārīk dhuāñ

phailtā jaatā hai

bhar detā hai us vaadī ko

jis ke har goshe meñ

ik naqsh munavvar thā abhī

koī saaya

koī ḳhushbū se mahaktā saaya

mujh ko chhūtā thā

mire dil meñ utartā thā abhī

pairahan merā mahaktā hai

abhī tak

lekin

kaisī tanhā.ī hai

aur dard hai ḳhāmoshī hai

vo jo aa jaa.e to

ye dard bhī āvāz bane

aur soyā huā ye jism

koī saaz bane

an-ginat taar

jhanak jaa.eñ jhanakte hī raheñ

jal uTheñ chāñd ka.ī

zehn ke parde pe abhī

aur andar ke samundar meñ bhañvar paḌ jaa.eñ

phir se khīñcheñ hameñ ik baar

usī shiddat se

ek mādūm se

tārīk se nuqte kī taraf

vahī nuqta jise jaanā bhī to

an-jānā rahā

huk uThti hai

jala deti hai jism-o-jaan ko

dil laraz uThta hai

aankhon se dhuan uThta hai

ye dhuan

hijr ka tarik dhuan

phailta jata hai

bhar deta hai us wadi ko

jis ke har goshe mein

ek naqsh munawwar tha abhi

koi saya

koi KHushbu se mahakta saya

mujh ko chhuta tha

mere dil mein utarta tha abhi

pairahan mera mahakta hai

abhi tak

lekin

kaisi tanhai hai

aur dard hai KHamoshi hai

wo jo aa jae to

ye dard bhi aawaz bane

aur soya hua ye jism

koi saz bane

an-ginat tar

jhanak jaen jhanakte hi rahen

jal uThen chand kai

zehn ke parde pe abhi

aur andar ke samundar mein bhanwar paD jaen

phir se khinchen hamein ek bar

usi shiddat se

ek madum se

tarik se nuqte ki taraf

wahi nuqta jise jaana bhi to

an-jaana raha