hijr ki andhi raaten

kañpkañpātā sā badan barf sī ThanDī rāteñ

ye qayāmat sī ka.ī muddatoñ lambī rāteñ

ye sulagte hue jazbāt meñ dahkī rāteñ

niim sī kaḌvī karele se kasīlī rāteñ

kitnī zālim haiñ ye tanhā.ī meñ Duubī rāteñ

tum pe utrī haiñ kabhī hijr kī andhī rāteñ

tum pe utrī hī nahīñ hijr kī andhī rāteñ

mahfileñ chup haiñ kabhī chīḳhtī ḳhāmoshī hai

hosh meñ rah ke bhī ik ālam-e-mad.hoshī hai

yaad ke haiñ kabhī nashtar kabhī sargoshī hai

haa.e phailī sī havāsoñ pe bhī be-hoshī hai

hijr ke ḳhauf se haa.e Darī sahmī rāteñ

tum pe utrī haiñ kabhī hijr kī andhī rāteñ

tum pe utrī hī nahīñ hijr kī andhī rāteñ

hai bahārāñ meñ bhī bas ek ḳhizāñ kā mausam

jaan lene pe utārū hai mirī vahshat-e-ġham

ashk dikhte haiñ lahū se bhalā kaisā hai sitam

tum to kyā jaano mire vahshat-e-dil kā aalam

bārish-e-ashk se bhīgī huī giilī rāteñ

tum pe utrī haiñ kabhī hijr kī andhī rāteñ

tum pe utrī hī nahīñ hijr kī andhī rāteñ

ek vo vaqt thā gulshan meñ bahār aa.ī thī

aarzū vaqt ke ghoḌe pe savār aa.ī thī

pairāhan ġham kā ḳhushī pal meñ utaar aa.ī thī

ab ye lagtā hai jo aa.ī thī udhār aa.ī thī

lamha lamha mujhe nāgin sī ye Dastī rāteñ

tum pe utrī haiñ kabhī hijr kī andhī rāteñ

tum pe utrī hī nahīñ hijr kī andhī rāteñ

ek ye vaqt hai bas ālam-e-tanhā.ī hai

gulshan-e-dil pe faqat ġham kī ghaTā chhā.ī hai

haa.e jazbāt kī mayyat pe pazīrā.ī hai

kyā yahī maiñ ne vafāoñ kī jazā paa.ī hai

kuchh bhī suntī hī nahīñ haa.e ye berī rāteñ

tum pe utrī haiñ kabhī hijr kī andhī rāteñ

tum pe utrī hī nahīñ hijr kī andhī rāteñ

kanpkanpata sa badan barf si ThanDi raaten

ye qayamat si kai muddaton lambi raaten

ye sulagte hue jazbaat mein dahki raaten

nim si kaDwi karele se kasili raaten

kitni zalim hain ye tanhai mein Dubi raaten

tum pe utri hain kabhi hijr ki andhi raaten

tum pe utri hi nahin hijr ki andhi raaten

mahfilen chup hain kabhi chiKHti KHamoshi hai

hosh mein rah ke bhi ek aalam-e-madhoshi hai

yaad ke hain kabhi nashtar kabhi sargoshi hai

hae phaili si hawason pe bhi be-hoshi hai

hijr ke KHauf se hae Dari sahmi raaten

tum pe utri hain kabhi hijr ki andhi raaten

tum pe utri hi nahin hijr ki andhi raaten

hai bahaaran mein bhi bas ek KHizan ka mausam

jaan lene pe utaru hai meri wahshat-e-gham

ashk dikhte hain lahu se bhala kaisa hai sitam

tum to kya jaano mere wahshat-e-dil ka aalam

barish-e-ashk se bhigi hui gili raaten

tum pe utri hain kabhi hijr ki andhi raaten

tum pe utri hi nahin hijr ki andhi raaten

ek wo waqt tha gulshan mein bahaar aai thi

aarzu waqt ke ghoDe pe sawar aai thi

pairahan gham ka KHushi pal mein utar aai thi

ab ye lagta hai jo aai thi udhaar aai thi

lamha lamha mujhe nagin si ye Dasti raaten

tum pe utri hain kabhi hijr ki andhi raaten

tum pe utri hi nahin hijr ki andhi raaten

ek ye waqt hai bas aalam-e-tanhai hai

gulshan-e-dil pe faqat gham ki ghaTa chhai hai

hae jazbaat ki mayyat pe pazirai hai

kya yahi main ne wafaon ki jaza pai hai

kuchh bhi sunti hi nahin hae ye beri raaten

tum pe utri hain kabhi hijr ki andhi raaten

tum pe utri hi nahin hijr ki andhi raaten