hind ki ye shab-e-mahtab

aaj bhī tere liye sozish-e-ġham kam to nahīñ

zaḳhm-e-dil par tire hamdam koī marham to nahīñ

tū jo phūloñ kī tarah phuul kar itrātā hai

dekhnā yaar tire jaam meñ shabnam to nahīñ

hind kī ye shab-e-mahtāb bahut ḳhuub sahī

qalb-e-anjum kā magar dard abhī kam to nahīñ

chāñdnī-rāt ke va.ade bhī vafā hote haiñ

ai ġham-e-dil ye sabab lā.eq-e-mātam to nahīñ

tishna-kāmī mujhe majbūr to kartī hai magar

tere sāġhar se jhijaktā huuñ kahīñ ham to nahīñ

tū ne āsūdagī-e-shauq se khāyā hai fareb

qalb-e-shā.ir meñ jo dhaḌkan hai vo maddham to nahīñ

aaj 'mas.ūd' kī palkoñ pe diye haiñ raushan

sāthiyo un ke sitāroñ se magar kam to nahīñ

aaj bhi tere liye sozish-e-gham kam to nahin

zaKHm-e-dil par tere hamdam koi marham to nahin

tu jo phulon ki tarah phul kar itraata hai

dekhna yar tere jam mein shabnam to nahin

hind ki ye shab-e-mahtab bahut KHub sahi

qalb-e-anjum ka magar dard abhi kam to nahin

chandni-raat ke wade bhi wafa hote hain

ai gham-e-dil ye sabab laeq-e-matam to nahin

tishna-kaami mujhe majbur to karti hai magar

tere saghar se jhijakta hun kahin hum to nahin

tu ne aasudagi-e-shauq se khaya hai fareb

qalb-e-shair mein jo dhaDkan hai wo maddham to nahin

aaj 'masud' ki palkon pe diye hain raushan

sathiyo un ke sitaron se magar kam to nahin