hindostani bachche ka git

maiñ bachcha huuñ maiñ bachcha huuñ kabhī maiñ bhī baḌā hūñgā

abhī se kaise batlā.ūñ ki is duniyā meñ kyā hūñgā

maiñ jī bachpan se paḌhne aur likhne meñ lagā.ūñgā

kabhī khelūñgā ḳhush ho kar kabhī paḌhne ko jā.ūñgā

musībat kuchh bhī pesh aa jaa.e hargiz muñh na moḌūñgā

uThūñ jis kaam ke karne ko puurā kar ke chhoḌūñgā

maiñ is duniyā ke har ilm-o-hunar se āshnā ho kar

bajā lā.ūñgā mulk aur qaum kī ḳhidmat baḌā ho kar

maiñ apne sabr aur himmat se dukh par fat.h pā.ūñgā

maiñ taklīfeñ uThā.ūñgā magar kuchh kar dikhā.ūñgā

maiñ apne mulk kī qaumoñ ko aapas meñ milā dūñgā

jo laḌte haiñ unheñ sharbat mohabbat kā pilā dūñgā

musalmān aur hindū jain budh sikh aur īsā.ī

mirī koshish se us din sab ke sab ho jā.eñge bhaa.ī

ye saarī tāqateñ mil kar vatan ke kaam ā.eñgī

na.ī ik ruuh is meñ phūñk kar is ko jilā.eñgī

na.e sir se vatan ke dil meñ phir ik josh uTThegā

sanā.at kā zarā.at kā tijārat kā hukūmat kā

baḌhegī mulk kī raunaq baḌhegī is kī ābādī

jidhar dekho udhar rāhat jidhar dekho udhar shādī

huā aisā to 'nayyar' ham ḳhushī ke giit gā.eñge

ġhulāmī ke zamāne kī kahānī bhuul jā.eñge

main bachcha hun main bachcha hun kabhi main bhi baDa hunga

abhi se kaise batlaun ki is duniya mein kya hunga

main ji bachpan se paDhne aur likhne mein lagaunga

kabhi khelunga KHush ho kar kabhi paDhne ko jaunga

musibat kuchh bhi pesh aa jae hargiz munh na moDunga

uThun jis kaam ke karne ko pura kar ke chhoDunga

main is duniya ke har ilm-o-hunar se aashna ho kar

baja launga mulk aur qaum ki KHidmat baDa ho kar

main apne sabr aur himmat se dukh par fath paunga

main taklifen uThaunga magar kuchh kar dikhaunga

main apne mulk ki qaumon ko aapas mein mila dunga

jo laDte hain unhen sharbat mohabbat ka pila dunga

musalman aur hindu jain budh sikh aur isai

meri koshish se us din sab ke sab ho jaenge bhai

ye sari taqaten mil kar watan ke kaam aaengi

nai ek ruh is mein phunk kar is ko jilaengi

nae sir se watan ke dil mein phir ek josh uTThega

sanaat ka zaraat ka tijarat ka hukumat ka

baDhegi mulk ki raunaq baDhegi is ki aabaadi

jidhar dekho udhar rahat jidhar dekho udhar shadi

hua aisa to 'nayyar' hum KHushi ke git gaenge

ghulami ke zamane ki kahani bhul jaenge