husn

chal paḌī aThkheliyāñ kartī huī bād-e-nasīm

ik kalī ġhuncha banī ġhuncha chaTak kar gul banā

ḳhud-ba-ḳhud karne lagā vo apne ḳhāliq kī sanā

zarre zarre ko jagāne aa.ī gulshan meñ shamīm

Daalī Daalī ḳhud-ba-ḳhud detī hai mastī kā payām

muñh shagūfe kā koī chupke se aa kar dho gayā

pattā pattā ḳhud-ba-ḳhud hī kho ke kuchh paane lagā

būTe-būTe ne nihārā apnā husn-e-nā-tamām

ek titlī kar rahī hai aa ke sausan se savāl

aañkh mūñde so rahā hai aaj nargis kā shu'ūr

motiyā champā chañbelī apnī duniyā se haiñ duur

ai sakhī mujh ko batā de husn kā kyā hai ma.aal

phuul kī pattī pe dekhā maiñ ne shabnam kā shabāb

le uḌā surḳhī safedī sub.h-e-nau kā āftāb

chal paDi aThkheliyan karti hui baad-e-nasim

ek kali ghuncha bani ghuncha chaTak kar gul bana

KHud-ba-KHud karne laga wo apne KHaliq ki sana

zarre zarre ko jagane aai gulshan mein shamim

Dali Dali KHud-ba-KHud deti hai masti ka payam

munh shagufe ka koi chupke se aa kar dho gaya

patta patta KHud-ba-KHud hi kho ke kuchh pane laga

buTe-buTe ne nihaara apna husn-e-na-tamam

ek titli kar rahi hai aa ke sausan se sawal

aankh munde so raha hai aaj nargis ka shu'ur

motiya champa chanbeli apni duniya se hain dur

ai sakhi mujh ko bata de husn ka kya hai maal

phul ki patti pe dekha main ne shabnam ka shabab

le uDa surKHi safedi subh-e-nau ka aaftab