katik ka chand

chāñd kab se hai sar-e-shāḳh-e-sanobar aTkā

ghaas shabnam meñ sharābor hai shab hai aadhī

baam suunā hai, kahāñ DhūñDeñ kisī kā chehrā

(log samjheñge ki be-rabt haiñ bāteñ apnī)

sher ugte haiñ dukhī zehn se koñpal koñpal

kaun mausam hai ki bharpūr haiñ ġham kī beleñ

duur pahuñche haiñ sarakte hue uude bādal

chāñd tanhā hai (agar us kī balā.eñ le leñ?)

dosto jī kā ajab haal hai, lenā baḌhnā

chāñdnī raat hai kātik kā mahīna hogā

mīr-e-maġhfūr ke ash.ār na paiham paḌhnā

jiine vāloñ ko abhī aur bhī jiinā hogā

chāñd ThiThkā hai sar-e-shāḳh-e-sanobar kab se

kaun sā chāñd hai kis rut kī haiñ rāteñ logo

dhund uḌne lagī bunñe lagī kyā kyā chehre

achchhī lagtī haiñ divānoñ kī sī bāteñ logo

bhīgtī raat meñ dubkā huā jhīñgar bolā

kasmasātī kisī jhāḌī meñ se ḳhushbū lapkī

koī kākul koī dāman, koī āñchal hogā

ek duniyā thī magar ham se sameTī na ga.ī

ye baḌā chāñd chamaktā huā chehra khole

baiThā rahtā hai sar-e-bām-e-shabistāñ shab ko

ham to is shahr meñ tanhā haiñ, hamīñ se bole

kaun is husn ko dekhegā ye is se pūchho

sone lagtī hai sar-e-shām ye saarī duniyā

in ke hujroñ meñ na dar hai na darīcha koī

in kī qismat meñ shab-e-māh ko ronā kaisā

in ke siine meñ na hasrat na tamannā koī

kis se is dard-e-judā.ī kī shikāyat kahiye

yaañ to siine meñ niystāñ kā niystāñ hogā

kis se is dil ke ujaḌne kī hikāyat kahiye

sunñe vaalā bhī jo hairāñ nahīñ, hairāñ hogā

aisī bātoñ se na kuchh baat banegī apnī

suunī āñkhoñ meñ nirāshā kā ghulegā kājal

ḳhālī sapnoñ se na auqāt banegī apnī

ye shab-e-māh bhī kaT jā.egī be-kal be-kal

jī meñ aatī hai ki kamre meñ bulā leñ is ko

chāñd kab se hai sar-e-shāḳh-e-sanobar aTkā

raat us ko bhī nigal jā.egī bolo bolo

baam par aur na aa.egā kisī kā chehrā

chand kab se hai sar-e-shaKH-e-sanobar aTka

ghas shabnam mein sharabor hai shab hai aadhi

baam suna hai, kahan DhunDen kisi ka chehra

(log samjhenge ki be-rabt hain baaten apni)

sher ugte hain dukhi zehn se konpal konpal

kaun mausam hai ki bharpur hain gham ki belen

dur pahunche hain sarakte hue ude baadal

chand tanha hai (agar us ki balaen le len?)

dosto ji ka ajab haal hai, lena baDhna

chandni raat hai katik ka mahina hoga

mir-e-maghfur ke ashaar na paiham paDhna

jine walon ko abhi aur bhi jina hoga

chand ThiThka hai sar-e-shaKH-e-sanobar kab se

kaun sa chand hai kis rut ki hain raaten logo

dhund uDne lagi bunne lagi kya kya chehre

achchhi lagti hain diwanon ki si baaten logo

bhigti raat mein dubka hua jhingar bola

kasmasati kisi jhaDi mein se KHushbu lapki

koi kakul koi daman, koi aanchal hoga

ek duniya thi magar hum se sameTi na gai

ye baDa chand chamakta hua chehra khole

baiTha rahta hai sar-e-baam-e-shabistan shab ko

hum to is shahr mein tanha hain, hamin se bole

kaun is husn ko dekhega ye is se puchho

sone lagti hai sar-e-sham ye sari duniya

in ke hujron mein na dar hai na daricha koi

in ki qismat mein shab-e-mah ko rona kaisa

in ke sine mein na hasrat na tamanna koi

kis se is dard-e-judai ki shikayat kahiye

yan to sine mein niystan ka niystan hoga

kis se is dil ke ujaDne ki hikayat kahiye

sunne wala bhi jo hairan nahin, hairan hoga

aisi baaton se na kuchh baat banegi apni

suni aankhon mein nirasha ka ghulega kajal

KHali sapnon se na auqat banegi apni

ye shab-e-mah bhi kaT jaegi be-kal be-kal

ji mein aati hai ki kamre mein bula len is ko

chand kab se hai sar-e-shaKH-e-sanobar aTka

raat us ko bhi nigal jaegi bolo bolo

baam par aur na aaega kisi ka chehra