id aai hai

gulshan-e-zīst pe pur-kaif ghaTā chhā.ī hai

ruḳh pe har phuul ke ik husn hai ra.anā.ī hai

ab kalī firqa-parastī kī hai murjhā.ī hai

har taraf jashn-e-masarrat hai ki iid aa.ī hai

aaj kā din hai har ik maz.hab-o-millat ke liye

rang-raliyoñ ke liye aur mohabbat ke liye

aaj ke roz se dushman bhī sagā bhaa.ī hai

har taraf jashn-e-masarrat hai ki iid aa.ī hai

naqsh iz.hār-e-mohabbat kā ubhar jaatā hai

iid aatī hai to māhaul sañvar jaatā hai

iid maḳhsūs ibādat kā maza laa.ī hai

har taraf jashn-e-masarrat hai ki iid aa.ī hai

aaj kī raat se chhante hue anvār-e-sahar

bhā.ī-chāre kī fazā dekh ke tā-hadd-e-nazar

ruuh zulmat-kada-e-dahr kī tharrā.ī hai

har taraf jashn-e-masarrat hai ki iid aa.ī hai

jagmagāte hue bachchoñ ke rañgīle kapḌe

aur za.īfoñ ke javānoñ ke sajīle kapḌe

jin se rangīnī-e-gulzār bhī sharmā.ī hai

har taraf jashn-e-masarrat hai ki iid aa.ī hai

masjideñ markaz-e-sajda haiñ musalmānoñ kā

īd-gāheñ haiñ ki sailāb hai insānoñ kā

rahmat-e-haq hai jo māhaul pe lahrā.ī hai

har taraf jashn-e-masarrat hai ki iid aa.ī hai

duur tak ġham kā kahīñ naam nahīñ miltā hai

har taraf aish-o-masarrat kā yaqīñ miltā hai

shaam mustaqbil-e-rangīñ kī ḳhabar laa.ī hai

har taraf jashn-e-masarrat hai ki iid aa.ī hai

raqs kartī huī har samt masarrat kī bahār

dost ahbāb ke jhurmuT vo rafīqoñ kī qatār

aaj tanhā.ī ne mahfil kī jagah paa.ī hai

har taraf jashn-e-masarrat hai ki iid aa.ī hai

dostī amn sharāfat kā baḌhā.e hue haath

ham gale milte haiñ baḌh kar ke baḌe pyaar ke saath

jaise har shaḳhs se barsoñ kī shanāsā.ī hai

har taraf jashn-e-masarrat hai ki iid aa.ī hai

gulshan-e-zist pe pur-kaif ghaTa chhai hai

ruKH pe har phul ke ek husn hai ranai hai

ab kali firqa-parasti ki hai murjhai hai

har taraf jashn-e-masarrat hai ki id aai hai

aaj ka din hai har ek mazhab-o-millat ke liye

rang-raliyon ke liye aur mohabbat ke liye

aaj ke roz se dushman bhi saga bhai hai

har taraf jashn-e-masarrat hai ki id aai hai

naqsh izhaar-e-mohabbat ka ubhar jata hai

id aati hai to mahaul sanwar jata hai

id maKHsus ibaadat ka maza lai hai

har taraf jashn-e-masarrat hai ki id aai hai

aaj ki raat se chhante hue anwar-e-sahar

bhai-chaare ki faza dekh ke ta-hadd-e-nazar

ruh zulmat-kada-e-dahr ki tharrai hai

har taraf jashn-e-masarrat hai ki id aai hai

jagmagate hue bachchon ke rangile kapDe

aur zaifon ke jawanon ke sajile kapDe

jin se rangini-e-gulzar bhi sharmai hai

har taraf jashn-e-masarrat hai ki id aai hai

masjiden markaz-e-sajda hain musalmanon ka

id-gahen hain ki sailab hai insanon ka

rahmat-e-haq hai jo mahaul pe lahrai hai

har taraf jashn-e-masarrat hai ki id aai hai

dur tak gham ka kahin nam nahin milta hai

har taraf aish-o-masarrat ka yaqin milta hai

sham mustaqbil-e-rangin ki KHabar lai hai

har taraf jashn-e-masarrat hai ki id aai hai

raqs karti hui har samt masarrat ki bahaar

dost ahbab ke jhurmuT wo rafiqon ki qatar

aaj tanhai ne mahfil ki jagah pai hai

har taraf jashn-e-masarrat hai ki id aai hai

dosti amn sharafat ka baDhae hue hath

hum gale milte hain baDh kar ke baDe pyar ke sath

jaise har shaKHs se barson ki shanasai hai

har taraf jashn-e-masarrat hai ki id aai hai