ek aazad tair se

zindagī terī ai taa.ir hai bahut hī masrūr

ġham se duniyā ke nahīñ hotā kabhī tū ranjūr

terī rūdād masarrat bharā afsāna hai

josh-e-parvāz meñ tū mahv hai dīvāna hai

uḌtā rahtā hai tū marzī ke mutābiq apnī

kaif-o-rāhat se hai har-dam tirī mamlū hastī

dīn-o-duniyā ke rivāyāt se begāna hai

zindagī terī chhalaktā huā paimāna hai

dasht-o-sahrā meñ kabhī aur kabhī gulzāroñ meñ

barg-o-gul par hai kabhī to kabhī kohsāroñ meñ

shaam ke vaqt chahaknā tirā bhātā hai mujhe

terā har giit suhānā pasand aatā hai mujhe

sub.h-dam jab kabhī maiñ sū-e-chaman jaatā huuñ

jis taraf uThtī haiñ nazreñ maiñ tujhe paatā huuñ

vādī-o-koh meñ tū hai kabhī sahrāoñ meñ

āshiyāñ ek nahīñ koī tirā duniyā meñ

hai daraḳhtoñ pe kabhī dasht kabhī gulshan meñ

bhuul se aa bhī kabhī kaash mire dāman meñ

aa ki naġhme na.e pur-lutf sunā.ūñ tujh ko

aa ki āġhosh meñ luuñ aur ḳhilā.uñ tujh ko

haa.e kyoñ tā.ir-e-āzād tujhe vahshat hai

merā hote hue bhī mujh se tujhe nafrat hai

kis qadar haa.e alag mujh se phirā kartā hai

duur bekār tū kyoñ mujh se rahā kartā hai

vaj.h-e-begānagī ai kaash batā de tū mujhe

sarguzasht-e-dil-e-masrūr sunā de tū mujhe

zindagi teri ai tair hai bahut hi masrur

gham se duniya ke nahin hota kabhi tu ranjur

teri rudad masarrat bhara afsana hai

josh-e-parwaz mein tu mahw hai diwana hai

uDta rahta hai tu marzi ke mutabiq apni

kaif-o-rahat se hai har-dam teri mamlu hasti

din-o-duniya ke riwayat se begana hai

zindagi teri chhalakta hua paimana hai

dasht-o-sahra mein kabhi aur kabhi gulzaron mein

barg-o-gul par hai kabhi to kabhi kohsaron mein

sham ke waqt chahakna tera bhata hai mujhe

tera har git suhana pasand aata hai mujhe

subh-dam jab kabhi main su-e-chaman jata hun

jis taraf uThti hain nazren main tujhe pata hun

wadi-o-koh mein tu hai kabhi sahraon mein

aashiyan ek nahin koi tera duniya mein

hai daraKHton pe kabhi dasht kabhi gulshan mein

bhul se aa bhi kabhi kash mere daman mein

aa ki naghme nae pur-lutf sunaun tujh ko

aa ki aaghosh mein lun aur KHilaun tujh ko

hae kyon tair-e-azad tujhe wahshat hai

mera hote hue bhi mujh se tujhe nafrat hai

kis qadar hae alag mujh se phira karta hai

dur bekar tu kyon mujh se raha karta hai

wajh-e-beganagi ai kash bata de tu mujhe

sarguzasht-e-dil-e-masrur suna de tu mujhe