ek kahani

ham par thī pyāre bachcho naanī kī mehrbānī

rozāna raat ko vo kahtī thiiñ ik kahānī

ik raat ko sunāyā barsāt kā fasāna

kahne lagīñ ki mausam ik roz thā suhānā

thā dekhne ke qābil favvāra āsmānī

dariyā se lā ke bādal barsā rahe the paanī

tālāb ban gayā thā āñgan hamāre ghar kā

Tahnī pe us kī bachcho baiThā thā ek totā

us ko jhulā rahā thā aa kar havā kā jhoñkā

dālān meñ se billī tote ko tak rahī thī

lālach meñ raal us kī goyā Tapak rahī thī

jaldī se us ne hamla parchhā.īñ par kiyā jo

totā na haath aayā paanī meñ gir ga.ī vo

pachhtā.ī apne dil meñ ghabrā ke aa.ī ghar meñ

āḳhir to jānvar thī kāmil na thī nazar meñ

bachcho ḳhudā ne tum ko baḳhshī hai hoshiyārī

har kaam se ho zāhir dānishvarī tumhārī

hum par thi pyare bachcho nani ki mehrbani

rozana raat ko wo kahti thin ek kahani

ek raat ko sunaya barsat ka fasana

kahne lagin ki mausam ek roz tha suhana

tha dekhne ke qabil fawwara aasmani

dariya se la ke baadal barsa rahe the pani

talab ban gaya tha aangan hamare ghar ka

Tahni pe us ki bachcho baiTha tha ek tota

us ko jhula raha tha aa kar hawa ka jhonka

dalan mein se billi tote ko tak rahi thi

lalach mein ral us ki goya Tapak rahi thi

jaldi se us ne hamla parchhain par kiya jo

tota na hath aaya pani mein gir gai wo

pachhtai apne dil mein ghabra ke aai ghar mein

aaKHir to jaanwar thi kaamil na thi nazar mein

bachcho KHuda ne tum ko baKHshi hai hoshiyari

har kaam se ho zahir danishwari tumhaari