ek tanha be-barg shajar

kaun mujhe dukh de saktā hai

dukh to mere andar kī kisht-e-vīrāñ kā

ik tanhā be-barg shajar hai

rut kī nāzuk lāñbī poreñ

kirneñ ḳhushbū chaap havā.eñ

jismoñ par jab reñgne phirne lagtī haiñ

mere andar dukh kā nangā peḌ bhī jaag uThtā hai

tang masāmoñ ke ġhurfoñ se

lambī nāzuk shāḳheñ bāhar aa kar

tan kī andhī shiryānoñ meñ qadam qadam chalne lagtī haiñ

shiryānoñ se ragoñ ragoñ se nasoñ ke andar tak

jaane lagtī haiñ

phir vo garm lahū meñ Dhal kar

ik ik baal kī jaḌ tak phailtī jaatī haiñ

aur ye merā sadiyoñ purānā maskan ḳhākī maskan

ḳhud bhī ek shajar ban jaatā hai

vaqt kī qatra-qatra Tapaktī

surḳh zabāñ kī nok pe aa kar

jam jaatā hai

kaun mujhe dukh de sakta hai

dukh to mere andar ki kisht-e-viran ka

ek tanha be-barg shajar hai

rut ki nazuk lanbi poren

kirnen KHushbu chap hawaen

jismon par jab rengne phirne lagti hain

mere andar dukh ka nanga peD bhi jag uThta hai

tang masamon ke ghurfon se

lambi nazuk shaKHen bahar aa kar

tan ki andhi shiryanon mein qadam qadam chalne lagti hain

shiryanon se ragon ragon se nason ke andar tak

jaane lagti hain

phir wo garm lahu mein Dhal kar

ek ek baal ki jaD tak phailti jati hain

aur ye mera sadiyon purana maskan KHaki maskan

KHud bhi ek shajar ban jata hai

waqt ki qatra-qatra Tapakti

surKH zaban ki nok pe aa kar

jam jata hai