iKHtitam se pahle

roz yuuñ hī hotā hai

soch ke darīchoñ se

yaad kī hasīñ pariyāñ nāchtī utartī haiñ

haath thaam kar merā

sañg sañg chaltī haiñ

aur phir vahī qissa ibtidā se āḳhir tak

harf harf

ḳhvāboñ kā pairahan badaltā hai

scrēn pe jaise koī film chaltī ho

aur har tamāshā.ī

dam-ba-ḳhud ho hairāñ ho

is hujūm meñ tanhā dekh kar koī mujh ko

mere paas aatā hai

har savāl āñkhoñ kā

aise mujh ko taktā hai

jaise tazkira us kā ḳhud mirī kahānī hai

maiñ use pakaḌne ko

jab bhī haath phailā.ūñ

silsila ḳhayāloñ kā TuuT kar bikhar jaa.e

jaise raushnī gul ho scrēn bujh jaa.e

jaise iḳhtitām se pahle film hī Thahar jaa.e

roz yuuñ hī hotā hai

roz yun hi hota hai

soch ke darichon se

yaad ki hasin pariyan nachti utarti hain

hath tham kar mera

sang sang chalti hain

aur phir wahi qissa ibtida se aaKHir tak

harf harf

KHwabon ka pairahan badalta hai

screen pe jaise koi film chalti ho

aur har tamashai

dam-ba-KHud ho hairan ho

is hujum mein tanha dekh kar koi mujh ko

mere pas aata hai

har sawal aankhon ka

aise mujh ko takta hai

jaise tazkira us ka KHud meri kahani hai

main use pakaDne ko

jab bhi hath phailaun

silsila KHayalon ka TuT kar bikhar jae

jaise raushni gul ho screen bujh jae

jaise iKHtitam se pahle film hi Thahar jae

roz yun hi hota hai