ilm

ilm kī vus.at kā koī bhī sirā hotā nahīñ

ilm kī kashtī kā koī nāḳhudā hotā nahīñ

ilm vāloñ ko muqaddar se gila hotā nahīñ

ilm vāloñ kā koī bhī juz ḳhudā hotā nahīñ

ilm hai to dar-haqīqat aadmī hai aadmī

ilm hai to us kī duniyā meñ rahegī raushnī

ilm vo shai hai jise koī churā saktā nahīñ

chhīnñā chāhe ise koī to pā saktā nahīñ

ilm hai to zindagī koī dikhā saktā nahīñ

ilm hai to aadmī dozaḳh meñ jā saktā nahīñ

ilm hī se ab jihālat ko miTāyā jā.egā

ilm se āzād hindostāñ banāyā jā.egā

ilm duniyā-e-jahālat meñ hai laatā inqalāb

ilm chamkātā hai zarroñ ko banā kar māhtāb

ilm se aalam kā ruḳh jaise shagufta ho gulāb

ilm hī se duur hotā hai hamesha pech-o-tāb

ilm raushan kartā hai tārīkiyoñ ko is tarah

rāsta batlā.e bijlī bādaloñ meñ jis tarah

jis kisī ne pā liyā hai ilm kā rangīn baaġh

jis kisī ne ilm kī rāhoñ kā paayā hai surāġh

mustaqil us ke irāde us kā raushan hai dimāġh

āñdhiyāñ bhī ab bujhā saktī nahīñ us kā charāġh

azmat-e-ilm-o-hunar se baḌh ke koī shai nahīñ

qadr-o-qīmat ahl-e-fan kī har jagah hai har kahīñ

ilm ki wusat ka koi bhi sira hota nahin

ilm ki kashti ka koi naKHuda hota nahin

ilm walon ko muqaddar se gila hota nahin

ilm walon ka koi bhi juz KHuda hota nahin

ilm hai to dar-haqiqat aadmi hai aadmi

ilm hai to us ki duniya mein rahegi raushni

ilm wo shai hai jise koi chura sakta nahin

chhinna chahe ise koi to pa sakta nahin

ilm hai to zindagi koi dikha sakta nahin

ilm hai to aadmi dozaKH mein ja sakta nahin

ilm hi se ab jihaalat ko miTaya jaega

ilm se aazad hindostan banaya jaega

ilm duniya-e-jahaalat mein hai lata inqalab

ilm chamkata hai zarron ko bana kar mahtab

ilm se aalam ka ruKH jaise shagufta ho gulab

ilm hi se dur hota hai hamesha pech-o-tab

ilm raushan karta hai tarikiyon ko is tarah

rasta batlae bijli baadalon mein jis tarah

jis kisi ne pa liya hai ilm ka rangin bagh

jis kisi ne ilm ki rahon ka paya hai suragh

mustaqil us ke irade us ka raushan hai dimagh

aandhiyan bhi ab bujha sakti nahin us ka charagh

azmat-e-ilm-o-hunar se baDh ke koi shai nahin

qadr-o-qimat ahl-e-fan ki har jagah hai har kahin