ilm

sar-e-sāhil khaḌā huuñ fikr meñ gum huuñ

samundar kitnā gahrā hai

nigāh-e-justujū zehn-e-rasā majbūr aur aajiz

lab-e-tahqīq bhī gum-sum

nigāh-e-vus.at-e-fikr-o-nazar harf-e-basīrat kā ahāta kar nahīñ paatī

shu.ūr-o-fahm ke saa.e jhulas jaate haiñ rāhoñ meñ

tajassus jis qadar gahrā utartā hai

vajūd-e-tishnagī kuchh aur gahrā hotā jaatā hai

azal se nuqta-e-avval hamāre karb kā shāyad

shanāvar to ka.ī aa.e

chhuā har ek qatre ko

magar koī sadāqat ban ke gahrā.ī se kab ubhrā

ye ik mauj-e-pareshāñ hai ki andhī pyaas raushan hai

bikhartā dard TuuTī umr kā har āḳhirī lamha

isī ġham meñ guzartā hai

ki kitnī kaT chukī hai kitnī baaqī hai

ba-īñ kāvish

abhī tak jhaag hai dast-e-tajassus meñ

sadaf to tah meñ milte haiñ

magar ye tah kahāñ par hai

sar-e-sāhil khaḌā huuñ fikr meñ gum huuñ

sar-e-sahil khaDa hun fikr mein gum hun

samundar kitna gahra hai

nigah-e-justuju zehn-e-rasa majbur aur aajiz

lab-e-tahqiq bhi gum-sum

nigah-e-wusat-e-fikr-o-nazar harf-e-basirat ka ahata kar nahin pati

shuur-o-fahm ke sae jhulas jate hain rahon mein

tajassus jis qadar gahra utarta hai

wajud-e-tishnagi kuchh aur gahra hota jata hai

azal se nuqta-e-awwal hamare karb ka shayad

shanawar to kai aae

chhua har ek qatre ko

magar koi sadaqat ban ke gahrai se kab ubhra

ye ek mauj-e-pareshan hai ki andhi pyas raushan hai

bikharta dard TuTi umr ka har aaKHiri lamha

isi gham mein guzarta hai

ki kitni kaT chuki hai kitni baqi hai

ba-in kawish

abhi tak jhag hai dast-e-tajassus mein

sadaf to tah mein milte hain

magar ye tah kahan par hai

sar-e-sahil khaDa hun fikr mein gum hun