in your absence

na-jāne kaun sī manzil pe apne pair so.eñge

na-jāne kin jazīroñ par hamāre phuul khilne haiñ

kabhī to in jabīnoñ par

kisī ne bosa denā hai

hamāre zaḳhm silne haiñ

shikasta dil kahāñ jaa.eñ

du'ā māñgeñ

du'ā.eñ bhī faqat lafzoñ kī varzish ke sivā kyā haiñ

sabhī ikke hamāre paas haiñ par jiit us kī hai

hamāre hāfize meñ aaj bhī vo vaqt taaza hai

kisī ne niiñd kī vaadī meñ 'uryānī bikherī thī

'ajā.ib-ghar kī sīḌhī par

koī ainak utāre ro rahā hai

guzre vaqtoñ par

magar mehñdī lage hāthoñ ko is se kyā ġharaz hogī

kivāḌoñ par jamī kaa.ī kisī kī dastakoñ se saaf honī hai

nahīñ mā'lūm kitne din hamārī raat honī hai

traffic warden se pūchhnā qisse hasīnoñ ke

jo jhurmuT meñ guzartī haiñ

dilāse dil ke locker meñ chhupā.e hañstī rahtī haiñ

kisī dukh kī agar vo chābiyāñ dekheñ to Dar jaa.eñ

hameñ tanhā.ī khātī hai

hameñ koī nahīñ suntā

hameñ bhī baat aatī hai

ka.ī message hamāre note paiDoñ meñ

paḌe bosīdgī kī shāḳh par jhūleñ

magar kab tak

na-jaane kaun si manzil pe apne pair soenge

na-jaane kin jaziron par hamare phul khilne hain

kabhi to in jabinon par

kisi ne bosa dena hai

hamare zaKHm silne hain

shikasta dil kahan jaen

du'a mangen

du'aen bhi faqat lafzon ki warzish ke siwa kya hain

sabhi ikke hamare pas hain par jit us ki hai

hamare hafize mein aaj bhi wo waqt taza hai

kisi ne nind ki wadi mein 'uryani bikheri thi

'ajaib-ghar ki siDhi par

koi ainak utare ro raha hai

guzre waqton par

magar mehndi lage hathon ko is se kya gharaz hogi

kiwaDon par jami kai kisi ki dastakon se saf honi hai

nahin ma'lum kitne din hamari raat honi hai

traffic warden se puchhna qisse hasinon ke

jo jhurmuT mein guzarti hain

dilase dil ke locker mein chhupae hansti rahti hain

kisi dukh ki agar wo chabiyan dekhen to Dar jaen

hamein tanhai khati hai

hamein koi nahin sunta

hamein bhi baat aati hai

kai message hamare note paiDon mein

paDe bosidgi ki shaKH par jhulen

magar kab tak